ରଜମଣ୍ଡା

        

ମଣ୍ଡା ମୋର ନାମ ମୁହିଁ ସରଗର ଫଳ l

ଧବଳ ଦେହଟି ମୋର ସୁଠାମ ସୁଗୋଲ ll

ଛେନା,ନଡ଼ିଆ ଗୁଡ଼େ ମୋ ଭରା ଅନ୍ତପୁର l

ସୁଆଦ ନିଆରା ତା'ର ବୋଲି ଥାଅ ପୁର ll

ଦାରୁଦେବତାଙ୍କ ଭୋଗଥାଳେ ଥାଏ ଭରା l

ମଣ୍ଡା, ଆରିସାର ସାଥେ ଲଡ଼ୁ ଓ କାକରା ll

ଧବଳେଶ୍ୱରଙ୍କ ପାଶେ ଭୋଗ ମଣ୍ଡା ଗଜ l

କାର୍ତ୍ତୀକ ଏକାଦଶୀରେ ଭକତ ସମାଜ ll

ଦ୍ୱାପରରେ ଖାଇ ଭୀମ ଦୁଃଶାସନ ମଣ୍ଡା l

ହୋଇଥିଲେ ଗୁଣ୍ଡା ବଡ଼ ଭୁଶୁଣ୍ଡା ଭୁଶୁଣ୍ଡା ll

ମହାଭାରତରେ କଥା ରାକ୍ଷସ ଟେ ଥିଲା l

ମଣ୍ଡାଖାଇ ଭୀମ ତାକୁ ଗଡ଼ାଇ ମାରିଲା ll

ଦଶହରା ମଣ୍ଡା କଥା ଶୁଣି ଥିବେ ଭାଇ l

ଶ୍ରୀରାମ ପୂଜିଲେ ଜଗଦମ୍ବା ଦୟାମୟୀ ll

ଦଇତ ବଧିଲେ ଲଙ୍କେ ଯାଇ ଗଣ୍ଡା ଗଣ୍ଡା l

ସମୁଦ୍ର ଲଂଘିଲେ ହନୁ ଖାଇ ପୁଞ୍ଜେ ମଣ୍ଡା ll

ତିଆରି ମୋହର ଅଟେ ସରଳ ଅତୀବ l

ଚାଉଳ ଚୁନାରେ ଯନ୍ତା ପ୍ରସ୍ତୁତ କରିବ ll

ଛେନା,ଗୁଡ଼,ନଡ଼ିଆକୁ ପାଗ ନେବ କରି l

ଅଥାରେ ସିଦ୍ଧକରିବ ପେଟ ମଧ୍ୟେ ଭରି ll

ଦୁଇ ତିନି ଦିନ ଯତ୍ନେ ରହେ ମୁହିଁ ତାଜା l

ପୁରୁଣାହେଲେ ମିଳଇ ତହୁଁବେଶି ମଜ୍ଜା ll

ମଣ୍ଡା ବିନେ ଉତ୍କଳୀର ଓଷା ହୁଏ ନାହିଁ l

ରଜ ପରବରେ ମୋତେ ଭୁଲିବନି ଭାଇ ll