ରାକ୍ଷୀରେ ରାକ୍ଷୀରେ ରାକ୍ଷୀ

ରାକ୍ଷୀରେ ରାକ୍ଷୀରେ ରାକ୍ଷୀ

ତୋତେ ବାନ୍ଧି ଦେବି

ମୋ ଭାଇ ହାତରେ

ରହିବୁ ତୁ ଚିର ସାକ୍ଷୀ,

ଭାଇ ଭଉଣୀ ଆମେ ଦୁହେଁ

ମାଆ ବାପାଙ୍କର ଦୁଇ ଆଖି ।

ମୋ ଭାଇ ଦେଖାଏ

ଯେଉଁ ବାଟ ଚାଲେ ମୁଁ ଦେଖି,

ତାର ସେନେହ ମୋ ହୃଦ ଚନ୍ଦନ

ନିଏ ସରାଗରେ ମାଖି ।

ରାକ୍ଷୀରେ ରାକ୍ଷୀରେ ରାକ୍ଷୀ

ମୋ ଭାଇ ମୋ ଉପରେ

ସଦା ଶୁଭଦୃଷ୍ଟି ଥାଏ ରଖି,

କଥା ତାର ସବୁ ମାନୁ ଥାଏ ମୁଁ

ତା ମନକୁ ପରଖି ।

ଭାଇର ଇଚ୍ଛା ମୁଁ ବଡ଼ ହୁଏ

ଭଲ ହୁଏ ରୂପ ଗୁଣରେ

ଆଶାକୁ ତାର ରଖେ ଲେଖି,

ମୋ ଭାଇର ମୁଁ ଭାରି ଅଲିଅଳି

ସେ ମୋ ଯତନ ନିଏ

ମୋତେ ଦେଖିବାକୁ ସୁଖୀ ।

ରାକ୍ଷୀରେ ରାକ୍ଷୀରେ ରାକ୍ଷୀ

ଭାଇ ମୋର ଭୁଲ୍ ଦେଖେ

ଅତି ପାଖରୁ ନିରେଖି,

ସୁଧୁରି ଯିବାକୁ ବଦଳେ ନିଜେ

ତା ଉପଦେଶକୁ ମାନେ ମୁଁ

ସବୁ ଟିକିନିଖି ।

ମୋ ଭାଇ ହୃଦୟ ପଞ୍ଜୁରୀର

ମୁଁ ଏକ ସୁନା ପକ୍ଷୀ,

ଅତି ଗେଲରେ ମୋତେ ରଖିଛି

ଦିଏନା ହେବାକୁ ନିରିମାଖି ।

ରାକ୍ଷୀରେ ରାକ୍ଷୀରେ ରାକ୍ଷୀ

ଆମ ଭାଇ ଭଉଣୀର

ପବିତ୍ର ସଂପର୍କ ଅମ୍ଳାନ ରଖି,

ଜୀବନର ଚଲା ପଥେ ପଥେ

ମୁଁ ଚାଲୁଥିବି ସଳଖି ।

ମୋ ଭାଇ ମୋ ପାଇଁ

ଦେବଦୂତ ହୋଇ ଆସିଛି

ତା ନଜର ମୋ'ଠି ରହିଛି ଲାଖି,

ସେ ମୋ ରକ୍ଷା କବଚ ହୋଇ

ଯୁଗ ଯୁଗ ପାଇଁ ରହୁ

ପ୍ରାର୍ଥନା କରୁଛି

ଆଶିଷ ଦେବେ ଚକାଆଖି ।