Library
ପୁନେଇଁ ରାତି
ପୁନେଇଁ ରାତି
ଜୋଛନା ସାଉଁଳା ପୁନେଇଁ ରାତିରେ
ମାଟିରୁ ଆକାଶ ହସେ
ତୋଫା ଆଲୁଅରେ ଦିଗ ଚଉଦିଗ
ସତେକି ସୁନ୍ଦର ଦିଶେ ।
ଦୋଳ ପୁନେଇଁରେ ରାତିସାରା ହୁଏ
ଦେଉଳରେ ଦୋଳଯାତ
ଭାରି ଭଲଲାଗେ ଦୋଳମେଲଣରେ
ହରି ଶଙ୍କରଙ୍କ ଭେଟ ।l
ଚଇତି ପୁନେଇଁ ଜହ୍ନ ଯୋଛନାରେ
ଚୋରା ଚଇତାଳି ମିଶି
ଅଜଣା ପୁଲକ କଅଁଳ ମନେ ମୋ
ଅଜାଣତେ ଯାଏ ନେସି ।
ବୈଶାଖ ପୂର୍ଣ୍ଣିମା ଜହ୍ନର ଆଲୁଅ
ବୁଦ୍ଧଙ୍କର ବାଣୀ ଘୋଷେ
ସତ୍ୟ ଅହିଂସା ର ମହିମା ମଣ୍ଡିତ
ଆଲୋକିତ ପଥ ହସେ ।
ଜ୍ୟେଷ୍ଠମାସ ଶେଷ ପୁନେଇଁ ପରଷ
ଜହ୍ନର ଜୋଛନା କହେ
କାଳିଆ ସାଆନ୍ତ ଜ୍ବରେ ଥରହର
ଖଇଫୁଟା ତାତି ଦେହେ ।
ଆଷାଢ଼ ପୂର୍ଣ୍ଣିମା ଜହ୍ନ ଆଲୁଅ ରେ
ଗୁରୁଙ୍କର ବନ୍ଦାପନା
ଶ୍ରାବଣ ପୂର୍ଣ୍ଣିମା ଝୁଲଣ ଯାତରା
ମନ ହୁଏ ଆନମନା ।
କୁଆଁର ପୁନେଇଁ ଜହ୍ନରାତି ଗାଏ
କୁଆଁର ପୁନେଇଁ ଗୀତ
ମନହୁଏ ଖାଲି ନାଚନ୍ତି ଝୁମନ୍ତି
ମାଟି ସାଥେ ହୋଇ ମିତ ।
ଇନ୍ଦୁ ପୁନେଇଁରେ ଜହ୍ନର ଆଲୁଅ
ଶିଶିରରେ ହୁଏ ଭିଜା
କାର୍ତ୍ତିକ ପୁନେଇଁ ତୋଫା ଜହ୍ନରେ ତ
ଡଙ୍ଗା ଭସାଇବା ମଜା ।
ମଗୁଶୁର ମାସ ପୁନେଇଁ ରାତିରେ
ପଣ୍ଡୁଓସା କରେ ମାଆ
ପୁଷ ପୁନେଇଁର ପୁଷ ମଣ୍ଡାପିଠା
ଲାଗେଭାରି ସୁଆଦିଆ ।
ମାଘ ପୂର୍ଣ୍ଣିମା ତ ଅଗିରା ପୁନେଇଁ
ଗାଁ ମୁଣ୍ଡେ ଅଗି ଜଳେ
ଶୀତ ଚାଲିଯାଏ ଫଗୁଣ ପରଷ
ରଙ୍ଗର ଅବିର ବୋଳେ ।
ବାରମାସ ବାର ପୁନେଇଁ ରାତିର
କାହାଣୀ ତ ନୂଆନୂଆ
ଆନନ୍ଦ ମୁଖର ସବୁ ଗାଁ ଗଣ୍ଡା
ଭାବ ହୁଏ ଦିଆନିଆ ।
