ପ୍ରଥମ ଶ୍ରେଣୀ

ଆମ ପିଲାଦିନେ ପ୍ରଥମ ଶ୍ରେଣୀରେ

ହେଉଥିଲା ନାମ ଲେଖା

ନେଉଥିଲେ ବାପା କାନ୍ଧରେ ବସାଇ 

କହି ମନଭୁଲା କଥା ।

ଭିଡିଧରି ମାଆ ପଣତ କାନୀକୁ

ପିଲାଏ ଛାଡନ୍ତି ନାହିଁ

ଯେତେ ପ୍ରବୋଧନା ଦେଲେ ବି ପିଲାଏ

କାନ୍ଦିଥାନ୍ତି କଇଁକଇଁ ।

ଦୋକାନକୁ ଯିବା ମିଠାଇ କିଣିବା

ଆଣିବା ଖେଳ କଣ୍ଢେଇ 

ଯେତେ ବୁଝାଇଲେ ପିଲା ତ ଅବୁଝା

ମନ ତାଙ୍କ ମାନେ ନାହିଁ ।

କିଛି ଦୂର ଯାଏ ଯାଆନ୍ତି ସଙ୍ଗରେ

ଲାଜ ଛାଡି ପିଲା ମାଆ

ବୁଝିଲେ ପିଲାଟି ଦେଖାଇ ବାହାନା

ବାପା ଠାରିଦ୍ଯନ୍ତି ଯାଆ ।

ଗେଲ ବସରିଆ ପିଲାଟି ଦେଖଇ

ଆଖିକୁ ତରାଟି ମେଲି

ତାପରି ଅନେକ ଟିକି ଟିକି ପିଲା

ବସିଛନ୍ତି ହୋଇ ମେଳି ।

ସରିଯାଏ ତାର ନାମ ଲେଖା ପର୍ବ

ଅନ୍ୟଥା ନଥାଏ ଗତି

ଭିଡିମୋଡି ହୋଇ କରେ ଯାଆଆସ

ବାପାଙ୍କ ସହିତ ନିତି ।

ପ୍ରଥମ ଶ୍ରେଣୀରେ ହୁଏ ବର୍ଣ୍ଣବୋଧ

ସଂଖ୍ୟାର ଗଣନ ଶିକ୍ଷା

ସୁନ୍ଦର ରଙ୍ଗୀନ ଛବି ମାନ ଦେଖି

ଶିଖେ ପିଲା ଚିତ୍ର ଅଙ୍କା ।

ବିଦ୍ଯାର ମନ୍ଦିରେ ଆଦର୍ଶ ଶିକ୍ଷକ 

ଅନୁକୂଳ ପରିବେଶ

ଗଢଇ ଉତ୍ତମ ଗୁଣବାନ ଛାତ୍ର 

ସୁନାଗରିକ ଅବଶ୍ଯ ।