ପ୍ରଥମ ଲହଡ଼ି
ପ୍ରଥମ ଲହଡ଼ି
କରୋନା ଯାଉଛି ମାଡ଼ି
ତମେ କେମିତି ଅଛ ହେ ମଢ଼ି ?
ଦେଖିଲ ତ ତମେ ପ୍ରଥମ ଲହଡ଼ି
ହାୟ ! କେତେ ମୁଣ୍ଡ ଗଲା ଗଡ଼ି !
ବରଷେ ହେଲାଣି ବାମ୍ଫ ନେଇ କିଏ
ଭୂତାଣୁକୁ ଦେଲା ଛାଡ଼ି
ଫୁସ୍ ଫୁସ୍ କରି ବି କହିଲାନି କିଛି
ପରମାଣୁ ବୋମାକୁ କଲା ଅନାଡ଼ି ।
ବୈଜ୍ଞାନିକ ଦେଖେ ଯନ୍ତ୍ରରେ ବସାଇ
ଦୁର୍ଦୁରା ଫଳ ପରି କଣ୍ଟା ସିଏ ଦିଏ ଫୋଡ଼ି
ଟାଙ୍କ ତା’ର ଯଦି ଦିଶୁଥାନ୍ତା ସତେ
ଦିଅନ୍ତି ମୁଁ ଦି ବାଡ଼ି ।
ପାଶ୍ଚାତ୍ୟ ଦେଶରେ ପଡ଼ିଗଲା ହାହାକାର
ଉନ୍ନତ ବିଜ୍ଞାନ ହଠାତ୍ ପାଇଲାନି ଉପଚାର
ଲୋକମାନେ ନିତି ହୁଅନ୍ତି ଶୀକାର
ଚାହୁଁ ଚାହୁଁ ବିଶ୍ୱ ହୋଇଗଲା ଛାରଖାର ।
ଆମେରିକା ବ୍ରାଜିଲ
ମେକ୍ସିକୋ ବ୍ରିଟେନ ପରି
ଇଟାଲୀ ଋଷିଆ ଫ୍ରାନ୍ସ ଆଦିରୁ
ଲକ୍ଷ ଲକ୍ଷ ଗଲେ ମରି ।
ଚୀନ ଭୂତାଣୁ ଧରାକୁ ଦଂଶିଲା
ଦରଦୀ ଭାରତ ସଞ୍ଜୀବନୀ ବାଣ୍ଟୁଥିଲା
ଦେଖୁ ଦେଖୁ ଏଣେ ମହାମାରୀ ବ୍ୟାପି
ନିଜ ଅଭ୍ୟନ୍ତର ଉଥଳ ପୁଥଳ ହେଲା ।
ଟୁଇଟର ଯୁଦ୍ଧେ ରାଜନୀତି ନେତା
ଅବସର ନ ଛାଡ଼ିଲା
ଏମନ୍ତେ ଭୂତାଣୁ ମରିବ କ’ଣ
ରାଜନୀତି ବୁଝି ଫୁଲ ଫଳ ଧରିଗଲା ।
ଘରୁ ବାହାରିଲେ ମୁହଁରେ ମାସ୍କ
ଛଅ ଫୁଟ ଦୂରତା ମାନିବା ଉଚିତ ଭଲା
ସାବୁନ ପାଣିରେ ଚାଳିଶ ସେକେଣ୍ଡ
ଦୁଇ ହାତ ଘଷି ଧୋଇବା ଜରୁରୀ ହେଲା ।
ଆରେକ ବାପୁଡ଼ା ସାନିଟାଇଜର
ଘରେ ଘରେ ସ୍ଥାନ ନେଲା
ପାଖେ ରଖି ତାକୁ ବ୍ୟବହାର କଲେ
କରୋନାରୁ ସିଏ ସୁରକ୍ଷା ପ୍ରଦାନ କଲା ।
ସରକାର ଦ୍ବାରା ସଚେତନ ବାର୍ତ୍ତା
ପ୍ରଚାର ପ୍ରସାର ହେଲା
ବୁଦ୍ଧିଜୀବୀଙ୍କ ପ୍ରଖର ଚେଷ୍ଟାରେ
ଜନତା ସୁଧାର ହେଲା ?
ଅମାନିଆ ପାଇଁ ପ୍ରଶାସନ ଯାହା
ଜରିମାନା ଠିକ୍ କଲା
ଡରିବା ତ ତାଙ୍କ ଜାତକରେ ନାହିଁ
ପକେଟ ଖୁଲମ୍ ଖୋଲା ।
ଜଗାଜଗି କରି ରସିଦ୍ କାଟିକି
ପୁଲିସ ହେଲା ଘାଇଲା
କରୋନା ଯୋଦ୍ଧା ନାମେ ଉତ୍-ଫୁଲ୍ଲ ହୋଇ
ତହବିଲ୍ ପାଇଁ କୋଟି କୋଟି ବଢ଼ାଇଲା ।
କଣ୍ଟେନମେଣ୍ଟ ଲକଡାଉନ ସଟଡାଉନ
ଅବଧି ବଢ଼ି ଚାଲିଲା
ଗ୍ରାମ୍ୟ ଜୀବନ ବଞ୍ଚାଇବା ପାଇଁ
ସରପଞ୍ଚ ଭାଇ ଜିଲାପାଳ ହୋଇଗଲା ।
ସ୍କୁଲ କଲେଜ ବିଶ୍ୱବିଦ୍ୟାଳୟେ
ପାଠପଢ଼ା ବନ୍ଦ ହେଲା
ଅନ୍-ଲାଇନରେ କି ପାଠ ପଢ଼ିଲେ ?
ଛାତ୍ରଛାତ୍ରୀଙ୍କର ଭବିଷ୍ୟତ ଢିଲା ହେଲା ।
କଳକାରଖାନା ଦୋକାନ ବଜାର
ଗାଡ଼ି ଘୋଡ଼ା ବନ୍ଦ ହେଲା
ଦାଦନ ଶ୍ରମିକ ଗରିବ ଗୁରୁବା
ବଡ଼ ହନ୍ତ ସନ୍ତ ହେଲା ।
ଭୋକ ଉପାସରେ ପିଲାଛୁଆ ଧରି
ବଞ୍ଚିବ ମରିବ କିଛି ନ ବିଚାରି
ସଂକ୍ରମଣକୁ ଖାତିର ନକରି
ଘରମୁହାଁ ହେଲା ଭାଗ୍ୟକୁ ଆଦରି ।
ପ୍ରବାସୀଙ୍କ ପାଇଁ ସଙ୍ଗରୋଧ କେନ୍ଦ୍ର
ଗାଆଁ ଗାଆଁରେ ଖୋଲିଲା
କେତେକ ଅବୁଝା ଗଳାବାଟ ଦେଇ
ଯାଞ୍ଚ ଏଡ଼ାଇ ଘରେ କରୋନା ବାଣ୍ଟିଲା ।
ଜୀବନ ଜୀବିକା ଦୋଛକିରେ ପଡ଼ି
ପ୍ରଶାସନ ଅନିକିଳି ହୁଗୁଳିଲା
ଡାକ୍ତରଖାନାରେ ହାଉଯାଉ ରୋଗୀ
ଖଟିଆ ସପନ ହେଲା ।
ଡାକ୍ତର ସେବିକା ସ୍ୱାସ୍ଥ୍ୟକର୍ମୀ ଆଶା
ଅଙ୍ଗନବାଡ଼ି ଦିଦି ସଫେଇକର୍ମୀଙ୍କୁ ଦେଖ
ଏଇ ଦୁର୍ଦ୍ଦିନରେ ଘରଦ୍ୱାର ଭୁଲି
ସେବା କରିବାକୁ ହେଲେ କି କେବେ ବିମୁଖ ?
ଘଣ୍ଟ ଘଣ୍ଟା ଥାଳି ଦେଇ ହୁଳହୁଳି
କରୋନା ଯୋଦ୍ଧାଙ୍କୁ ସମ୍ମାନ ଦେଲା ଜନତା
ପ୍ରାଣବଳି ଦେଇ ଅନେକ ଚାଲିଲେ
ବଞ୍ଚାଇବା ପାଇଁ ଧରାରେ ଜୀବନ ସତ୍ତା ।
ବାଉଁଶ ବାନ୍ଧିକି ଜଗିଲେ ଲୋକଙ୍କୁ
କରୋନା କି କିଳି ହେଲା
ସଂକ୍ରମଣ ମୃତ୍ୟୁ ତଥ୍ୟ ଛପାଛପି
କାଦୁଅ ଫିଙ୍ଗାରେ ତା’ର ଡାଳପତ୍ର କଅଁଳିଲା ।