ପ୍ରିୟା

ଇନ୍ଦ୍ରଧନୁର ସାତଟି ରଂଗକୁ

ସପ୍ତସତୀ ଗଲେ ନେଇ ,

ଦୁଧ ଅଳତାକୁ

ଫେଣ୍ଟା ଫେଣ୍ଟି କରି

ଅଷ୍ଟମ ରଂଗରେ

ଗଢ଼ିଲେ ତୁମକୁ ବିହି ।

କୋଇଲି ପୋଇଲି

ସ୍ତ୍ରୀ ହେଇ ଯେବେ

ନେଇ ଗଲା କଣ୍ଠ ସ୍ବର ,

ବଂଶୀ ଥିଲା ପାଶେ

ଦେଲେ ଗୋ ତୁମକୁ

କଥା ତୁମ ସୁମଧୁର ।

ମୀନ ଅବତାର

ଥିଲା ବୋଲି ତାଙ୍କ

କରିଲେ ମୀନ ନୟନା ,

ମୋନାଲିସା କାଳେ

ତୁମଠୁ ଚୋରେଇ

ହସେ ହେଇ ଆନମନା ।

ହଂସବାହିନୀ

ହଂସ ନେଇ ଗଲେ

ଗଜଲକ୍ଷ୍ମୀ ନେଲେ ଗଜକୁ ,

ଚାଲିକୁ କରିଲେ

ଅଳସୀ ଅଳସୀ

କଟି ଦେଇ ଦେଲେ ସିଂହକୁ ।

ଅଳକାପୁରୀକୁ

ଅଳି କରି ଯେବେ

ମାଗି ନେଲେ ସ୍ବର୍ଗ ରୂପସୀ ,

ମର୍ତ୍ତ୍ୟକୁ ପଠେଇ

କରିଲେ ତୁମକୁ

ଚିର ଯଉବନା ଷୋଡ଼ଶୀ ।

ତୁମେ ନନ୍ଦନବନର

ଚନ୍ଦନ କୁସୁମ

ଚନ୍ଦନେ ଚର୍ଚ୍ଚିତ କାନ୍ତି ,

କୁହ,ତୁମକୁ ପାଇବି ମୁଁ କେମିତି ?

ପ୍ରିୟା ।