ପ୍ରାୟଶ୍ଚିତ

ଆଖିର ଲୁହରେ ଯାତନା ଲହୁରେ 

ପ୍ରାୟଶ୍ଚିତ ହୁଏ କର୍ମର ଫଳ 

କୃତ କର୍ମ ଯେବେ ବିକୃତ ହୋଇଣ 

ଜୀବନ ବାଟରେ ସାଜଇ କାଳ ll

ଚାହୁଁ ଚାହୁଁ ଏଠି ଜୀବନ ଆକାଶେ 

ଦୁଃଖର ବାଦଲ ଆସଇ ଘୋଟି 

ବଦଳି ଯାଏ ଏ ଜୀବନର ସଜ୍ଞା 

ହତାଶରେ ଯାଏ ନୀରବେ ଲୋଟି ll

କାଲି ଥିଲା ଭଲ ଆଜି କାହିଁ ପାଇଁ

ଚାହୁଁ ଚାହୁଁ ଗଲା ବିଷାଦେ ଭରି 

କିଏ ଜାଣିଥିଲା ଏପରି ଘଟିବ 

ସବୁ ହସ ଖୁସି ଯିବ ଯେ ମରି ! ll

ପଲକେ ତକ୍ଷଣେ ସବୁକିଛି ଏଠି 

କାହିଁକି ହଠାତ୍ ବଦଳିଯାଏ 

ଖୁସି ଦୁନିଆରେ ଲାଗିଯାଏ ନିଆଁ 

କେଉଁ ଭୁଲ୍ ପାଇଁ ଏପରି ହୁଏ? ll

ପଥ ବହୁଦୂର ପ୍ରଶ୍ନ ବି ଅନେକ 

ଉତ୍ତର ତ ଏଠି ମିଳଇ ନାହିଁ

କୃତ କର୍ମ ଏଠି ନିଜ ଭାବନାରେ 

ଗୋଟି ଗୋଟି ହୋଇ ଉଠଇ ଚେଇଁ ll

ପ୍ରାୟଶ୍ଚିତ ଏଠି ପଶ୍ଚାତାପ ଆଣି 

କୃତ କର୍ମ ଫଳେ ଦିଅଇ ଦୋଷ 

ନିଷ୍ଠୁର ସମୟ ଦଣ୍ଡର ତାଣ୍ଡବେ 

ଯନ୍ତ୍ରଣାରେ ହୁଏ ଜୀବନ ଶେଷ ll