ପଞ୍ଚୁକ

   କାର୍ତ୍ତିକ ମାସରେ ପଞ୍ଚୁକ ପାଳ ଯେ

        ସକାଳୁ ତୁମେ ଗାଧୋଇ

   ମନ୍ଦିରେ ଯାଇକି ହାଜିରା ପକାଅ

        ପୂଣ୍ୟ ଅରଜିବା ପାଇଁ ।

   ଠେଲା ପେଲା ହେଇ ଦଳା ଚକଟାରେ

        କରିବ ଆଗ ଦର୍ଶନ

   ଡେରି ହେଲେ ପୂଣ୍ୟ ଭାଗ କମିଯିବ

        ଊଣା ହେଇଯିବ ମନ ।

   ବାକି ଦିନେ ସିନା ଆଠଟା ନହେଲେ

       ଭାଙ୍ଗେନି ଜମାରୁ ନିଦ

   ଯିଏ ଉଠେଇବ ଦି ପଦ ଶୁଣିବ

       ଖଟାଙ୍ଗ ପୁରାଣ ବେଦ ।

   କାର୍ତ୍ତୀକ ମାସରେ ଶୁଦ୍ଧ ଶାକାହାରୀ

       ମନ୍ଦିରରେ କର ଭିଡ

   ଅନ୍ୟ ମାସରେ ତ ପାଟି ସୁଆଦିଆ

       ଚୋବାଅ କୁକୁଡା ଗୋଡ ।

   ଶରୀର ଟା ତୁମ ମାସେ ଶୁଦ୍ଧ ହେଲେ

       ବାକି ମାସରେ ଅଶୁଦ୍ଧ

   ମାଛ ମାଂସ ଆଉ ଶୁକୁଆ ଖାଇ କି

      ଶରୀରୁ ଛାଡେନି ଗନ୍ଧ !

   ଧନ୍ୟ ଆମ ଏଇ ଧାର୍ମିକ ଭାବନା

       ଧନ୍ୟ ଏ ଆଇଁଷ ପ୍ରୀତି

   ପ୍ରକୃତ ଧର୍ମକୁ ଅରଜିବା ପାଇଁ

       କାହାର ବଳେନି ମତି ।

   ଦେଖାଣିଆ ଧର୍ମ କମେଇବା ପାଇଁ

       କରୁଚ କିଆଁ ପ୍ରୟାସ

   ସତ୍ୟ ପଥ ହୁଡି ଅବାଟେ ଧାଉଁଚ

       ପିଇବାକୁ ଖାଲି ବିଷ ।