ପକ୍ଷୀ
ପକ୍ଷୀ
ଦୁଃଖ ଦୁଃଖୀ ହେଉଥିଲା
ସୁଖ ସୁଖୀ ହେଉଥିଲା
ମୋ ଚଉହଦୀ ଚାରିପଟେ
ଆବର୍ତ୍ତମାନର ଆର୍ତ୍ତନାଦେ
ବିବର୍ତ୍ତମାନର ଅହଙ୍କାରେ
ନିବୃତ୍ତ ସବୁଜ କୋଠରୀରେ
କାଠିକୁଟା ସଂଗ୍ରହ କରି
ଗୁଟୁରୁ ଗୁଂ କରୁଥିବା ପାରା ଦୁଇଟି
ଅଣ୍ଡା ଦେଇ ଆହାର ଅନ୍ୱେଷଣରେ
ବିଲକ୍ଷଣ ଜାଣିପାରିଲେନି
ଅଣ୍ଡାରୁ ଛୁଆ ଫୁଟିବାର
ସମ୍ଭାବନା ହିଁ ନଥିଲା
କାରଣ ଅଣ୍ଡା ଗୁଡ଼ିକ ଖୋଳପା ହୋଇସାରିଥିଲା
କେମିତି କାହିଁକି ପ୍ରଶ୍ନରେ
ଦୁଃଖ ସୁଖ ସରହଦ ଟପି
ପକ୍ଷୀ ଦୁଇଟି ଉଷୁମେଇ ଚାଲିଥିଲେ ପାଳିକରି
ବଞ୍ଚିଥିଲେ ଉନ୍ମାଦନାରେ
ଚଞ୍ଚୁରେ ଚଞ୍ଚୁ ଘଷି ବର୍ଷା କାଳରେ
ଅଣ୍ଡାଗୁଡିକ ଫୁଟିଲେନି କାହିଁକି ପ୍ରଶ୍ନ ନଥିଲା ମୁଣ୍ଡରେ
ଗୁଟୁରୁ ଗୁଉଁ ଶବ୍ଦ ରହିରହି ଶୁଭୁଥିଲା ଥରେଥରେ।