ପୀଡିତା

କରିନାହିଁ ଦୋଷ

ଲଭିନାହିଁ ପୁରସ୍କାର

ଶ୍ରେଷ୍ଠ କୃତୀ ପାଇଁ ।

ତଥାପି.......

ମୁଁ ଚର୍ଚ୍ଚିତ ,

ବେବିନା,ଇତିଶ୍ରୀ,ନିର୍ଭୟା,ମନୀଷା.....

ଏମିତି ଅନେକ ନାମରେ ।

ମୋ ପାଇଁ ରାଜନୀତି ହଲଚଲ

ସମାଜରେ ମୁଁ କୁଆଡେ

ଆଜିକାଲି ମୁଖ୍ୟ ବିଷୟବସ୍ତୁ !

କିଛି କୁମ୍ଭୀର କାନ୍ଦଣା,

କିଛି ନିଷ୍କପଟ ଦରଦୀ ହୃଦୟର ବ୍ୟଥାରେ,

ଆତ୍ମୀୟଙ୍କ ଲୁହ ଆଉ କୋହରେ,

ମୁଁ ଆଶାୟୀ 

ନ୍ୟାୟ ପାଇଁ ।

ଖୁସି ଥିଲି

ଝିଅଟିଏ ବୋଲି,

ସଜାଇଥିଲି ସ୍ୱପ୍ନ ଏଇ ଆଖି ଦୁଇଟିରେ,

ମୁଁ କଣ ଜାଣିଥିଲି?

ରାକ୍ଷସମାନଙ୍କ ନଜରରେ

ମୁଁ କେବଳ ଉପଭୋଗ୍ୟବସ୍ତୁଟିଏ !

ଶରୀର ଖାଇସାରି

ଆଉ କଣ ବା ଥିଲା ମୋ ପାଖରେ ?

ଓଃ !

ନିସ୍ତେଜ ପ୍ରାଣଟିଏ ......

ପ୍ରମାଣ ଆଶଙ୍କାରେ

ପ୍ରାଣ ବି ପାଇନାହିଁ ନିସ୍ତାର ।

ଏବେ ସେମାନେ ମୁକ୍ତ ,

ମୁଁ କିନ୍ତୁ ବିଳାପ କରୁଛି

ଅଦୃଶ୍ୟରେ ।

ଶରୀର ବିହୀନ ମୋ 

ଆତ୍ମାର ଚାରିପଟେ

ଗୁଞ୍ଜରିଉଠୁଛି ଶବ୍ଦଟିଏ.....

ପୀଡିତା.......

  ପୀଡିତା....

      ପୀଡିତା....... ।