ଫଗୁଣର ପ୍ରୀତି ରଙ୍ଗ
ଫଗୁଣର ପ୍ରୀତି ରଙ୍ଗ
ଫଗୁଣ ରଙ୍ଗରେ ଭିଜିବାକୁ ମନ
ମାନୁନି ସଜନୀ ଜମା
ଥରେ ଯା' ଦେହରେ ଲାଗିଯାଏ ସଖୀ
ଦିଏ ଗୋ ମଧୁଜାତନା ।
ଲାଲ୍ ଟହଟହ ଫଗୁ ରଙ୍ଗରେ ତୁ
ଭିଜିବାକୁ ନାହିଁ ମନା
ଥରେ ଭିଜିଗଲେ ଆରେ ପ୍ରିୟ ସହି
ସେ ରଙ୍ଗ ଓଦା ଶୁଖେନା ।
ରଙ୍ଗରେ ନଥାଏ ମାଦକତା ଆଉ
ଫୁଲରେ ନ ଥାଏ ବାସ
ଲାଲ୍ ଟହଟହ ରଙ୍ଗର ପସରା
ରଙ୍ଗ କୁସୁମ ପଳାଶ ....
ବାସହୀନ ଯେଣୁ ପ୍ରାଣ ସଜନୀରେ
ସେ ତ ଆଦର ପାଏନା ।
ଆ' ରେ ସଜନୀ ମନଭରି ଭିଜି-
ଯିବା ଫଗୁଣର ରଙ୍ଗେ
ଜନମେ ଜନମେ ମିଶି ରହିଥିବା
ଦୁହେଁ ଦୁହିଁଙ୍କର ସଙ୍ଗେ...
ପ୍ରତି ଫଗୁଣରେ ଝରାଇଦେବା ଗୋ
ପୀରତି ମଧୁ ଝରଣା ।।