ଈଶ୍ୱର

ଈଶ୍ୱର : ଶରଶଯ୍ୟାରେ

କାହାପାଇଁ ଆଣିଚ କହିଲ

ଏତେ ସବୁ ସୁସ୍ୱାଦୁ ସୁବାସିତ ଦ୍ରବ୍ୟ

ଆ କାହା ପାଇଁ କରିଚ ପ୍ରତୀକ୍ଷା

କିଏ ବା ଏସବୁ ଖାଇବ ?

ପ୍ରଶ୍ନକଲି ଯେତେସବୁ 

ଉତ୍ତର ,ନ ଥିଲା କା ତୁଣ୍ଡେ 

ପରଖିଲି ଯାହାସବୁ ସଜ୍ଜିତ ହୋଇଚି

ସମର୍ପିତ ହେବ- ଏଇ ବଡଦାଣ୍ଡେ ।

କିଏ ନେବ ପାତ୍ରକୁ ସ୍ୱହସ୍ତେ

ଲାଗି କରିବାକୁ ଶ୍ରୀଛାମୁରେ 

ଶୁ୍ଦ୍ଧମନ୍ତ୍ର ଗାନେ

ବିକଳରେ କେ କାନ୍ଦେ ନିଇତି

ତାହା ସବୁ ପଡେନାହିଁ କାନେ ।

ଈଶ୍ୱର ବି-

ନୀରବ ନିଶବ୍ଦ ନିଶ୍ଚଳ କାକ୍ଟସ୍ର 

କଂଟକିତ ଦେହ

Advertisement

େ

ଗାଢନିଦ୍ରାରେ ଭୀଷ୍ମ ଶରଶଯ୍ୟା ପରି

ଛାଡ, କଣ ବା ମିଳିବ ଆଉ ଏଠି

ଯୋଉଠି ଈଶ୍ୱର ନାଚାର

ଈଶ୍ୱରୀୟ ସତ୍ତାମାନେ ସମାଧିସ୍ଥ

ସେଠି ଆଉ କେଉଁ ଈଶ୍ୱରଙ୍କୁ ଖୋଜିବାରେ

ଅଯଥା ସମୟ ନଷ୍ଟ କରନା 

ଅପେକ୍ଷା କର - 

ହୁଏତ ଈଶ୍ୱର ଫେରିପାରନ୍ତି :

ତାଙ୍କ ଇଲାକାକୁ -

ନୀଳତେଜ ଶୁଭ୍ରାଲୋକ ବଳୟମଧ୍ୟରୁ

ଏଠିକୁ ସେଠିକୁ ଆଉ ସବୁଠିକୁ 

ଯୋଉଠି ଆଞ୍ଜୁଳି ପାତି ବସିଥିବ

କୋରଡ ଆଖି - 

ମେରୁଦଣ୍ଡ ଛୁଊଁଥିବା ନାଭିବ୍ରହ୍ମ- 

ଜଳୁଥିବା ଉଦରର ଅନ୍ଧାରି ଆଲୋକେ ।