ଫେରିଛି ଫଗୁଣ

କଥା ଦେଇଥିଲ ଫେରିଲେ ଫଗୁଣ ତୁମେ ବି ଫେରିବ ବୋଲି

ଦେଖ ପ୍ରିୟା ଥରେ ଫେରିଛି ଫଗୁଣ ହାତେ ଧରି ରଙ୍ଗ ତୂଳୀ ,

ହସୁଛି ଧରଣୀ,ଫଗୁଣ ପରଶେ, ରଙ୍ଗର ପସରା ମେଲି

ମୁଁ ଏକା ଜଳୁଛି ବିରହ ନିଆଁରେ ତୁମେ ପାଶେ ନାହଁ ବୋଲି ।। ୧ ।।

ଆମ୍ରକାନନରେ ଗାଉଛି କୋକିଳ ପଞ୍ଚମ ରାଗିଣୀ ତୋଳି

ଉଡେ ପ୍ରଜାପତି ହରଷ ଚିତ୍ତରେ, ଖେଳୁଛି ଫୁଲରେ ଦୋଳି ,

ନବ ପ୍ରକରଣେ ନବୀନ ଶୋଭାରେ ହସେ ଧରା ମନ ଖୋଲି

ମୋ ଆଖିରେ କିନ୍ତୁ ଲୁହର ଶ୍ରାବଣ ପ୍ରିୟା ତୁମେ ନାହଁ ବୋଲି ।। ୨ ।।

ସକାଳ ଆସିଲେ କୁହୁଡ଼ି ସହିତେ ସୂର୍ଯ୍ୟ ଖେଳେ ଲୁଚକାଳି 

ବହୁଛି ମଳୟ ପ୍ରୀତି ଗନ୍ଧ ନେଇ, ପ୍ରେମ-ରଂଗ ଦିଏ ବୋଳି ,

ଆସିଛି ବସନ୍ତ, ପ୍ରେମିକ ପଣରେ ସାଥିରେ ଆଣିଛି ହୋଲି 

ମୋ ଜୀବନ କିନ୍ତୁ ଲାଗେ ଫିକା ଫିକା, ତୁମେ ପାଶେ ନାହଁ ବୋଲି ।। ୩ ।।

ବୁଝି ବି ବୁଝନା ଅବୁଝା ପ୍ରିୟା ମୋ କାହିଁ ଦୂରେ ଗଲ ଚାଲି !

ଫେରିଆସ ଥରେ ମନ ଅଗଣାକୁ ହୃଦୟ ଦୁଆର ଖୋଲି ।। ୪ ।।