ଫେରିଆରେ ଧନ ମୋର

ଫେରିଆରେ ଧନ ମାଆ କଥା ମାନି

ଅବୁଝା ହୁଅନା ଆଉ,

ସମାଜର ରୀତି ବଡ ବିଚିତ୍ରରେ

ଜାଣିଶୁଣି ଦେବେ ଦାଉ ।

ଅଧର୍ମ ଦାଣ୍ଡରେ ଧରମ କାନ୍ଦୁଛି

ଅସତ୍ୟ ହୋଇଛି ସତ୍ୟ,

ଭଲ କରମରେ ସାହା କେ' ନୋହିବେ

ଶତ୍ରୁ ଯେ' ହୋଇବେ ଜାତ ।

ବାଲ୍ୟକାଳୁ ତୋତେ ଶିଖାଇଛି ଧନ

ଯିବାକୁ ଧରମ ପଥେ,

ସେହି ପଥେ ଆଜି ଚାଲୁଛୁ ବାବୁରେ

ଭୟ ତୁ ନକରି ଚିତ୍ତେ ।

ଚକ୍ରବ୍ୟୁହ ମଧ୍ୟେ ଅଭିମନ୍ୟୁ ପରି

ହେବ ବୋଲି ତୋର ଦଶା,

ଦିବାନିଶି ମୋର ପଲକ ପଡୁନି

ଉଡି ଯାଉଅଛି ହଂସା ।

ଫେରିଆ ଧନରେ ଚାହିଁଛି ତୋ ବାଟ

ମାଆ କଥା ଥରେ ଭାଳି,

ଲୋଡାନାହିଁ ମୋର ଧନ ଦଉଲତ

ଆରେ ମୋ ହୃଦ ସଙ୍ଖାଳୀ ।

ତୋ ଠାରୁ ବଳି କି' ସଂପଦ ହୋଇବ ?

ମୋ ପାଇଁରେ ଗୁଣମଣି,

ମାଆ ହୃଦବ୍ୟଥା ବୁଝି ତୁ ଫେରିଆ

ଆରେ ମୋ ରତନ ଖଣି ।

ଫେରିଆରେ ଧନ ଫେରିଆ ଘରକୁ

ହୁଅନାହିଁ ପରବାସୀ,

ଶାଗ ମୁଗ ଅବା ସଜ ବାସି ଖାଇ

ବିତାଇବା ଦିନ ହସି ।