ପହେଲା ଗଲି ଇସ୍କୁଲ୍ ପଢି

ବଡା ଡର୍ ଲାଗୁଥିଲା ମତେ

          କାନ୍ଧୁଥିଲି ତଲେ ଗଡି ଗଡି ,

ମାଆ,ବୁଆର୍ ହାତ୍ କେ ଛାଡି

          ପହେଲା ଗଲି ଇସ୍କୁଲ୍ ପଢି ।

ଡର୍ ଲାଗୁଥିଲା କେତିନି କେତେ

     କାଏ ବଲବେ ସାର୍ ମେଡମ୍ ମତେ,

ଅଧା ବାଟ୍ ଯାଇ ଘୁଚି ଆସୁଥିଲି

      ଯା ପଢି ମାଆ କହୁଥିଲା କେତେ ।

ନାଇଁ ଯାଏ,ନାଇଁ ଯାଏ କହୁଥିଲି

        ମାଆ କେ ମୋର୍ ଡରଉଥିଲି,

କେତେ ଲାଡେ ଗେଲେ ବୁଝେଇ

        ମାଆ କେ ମୋର୍ ମନଉଥିଲି ।

ମାଆ ବି ମୋର୍ ଚାଲାକ୍ ଥିଲା

         ମିଠା କଥା ମତେ କହେଲା,

ଯା ରେ ପୁଓ ଇସ୍କୁଲ୍ କେ ପଢି

          ତୁଇଁ ପରେ ମୋର୍ ଗେହ୍ଲା ।

ତୋର୍ ଲାଗି ପୁଓ ରାନ୍ଧି ଥିମି

         ଶିକାର୍, ଭାତ୍,ତରକାରି,

ଯେତେବେଲେ ଛୁଟି ହେବା

       ଆଏବୁ ଡଉଡି,ଡଉଡି କରି ।

ସେ କଥା ସୋର୍ ପଡିଗଲେ

      ଆଖିର୍ ପାଏନ୍ ଯାଉଛେ ଝରି,

ଆଏତା ଆର୍ ଥରେ ଫିରି

    ନାଚତି କେତେ କିନ୍ଦିରୀ କିନ୍ଦିରୀ ।