ପାକ୍ ଅଧିକୃତ ମାଟି
ପାକ୍ ଅଧିକୃତ ମାଟି
ଦେଶ ସାରା ଆଜି ହେଲେଣି ତ ରାଜି
ସମର୍ଥନେ ଖୋଲି ପାଟି
ଛଡାଇକି ଭାଇ ଆଣିବ କି ନାହିଁ
ପାକ୍ ଅଧିକୃତ ମାଟି ?
ହେ ବୀର ସନ୍ତାନ ଏ ଦେଶର ମାନ
ବଢାଇ ସାରିଛ ତୁମେ
ସେନା ଜୟଗାନ କରି କୋଟି ପ୍ରାଣ
ଖୁସିରେ ଉଛୁଳି ଝୁମେ ।
ଜାଣିଛୁ ହେ ବୀର ଝୁଙ୍କି ନାହିଁ ଶିର
ଚିରକାଳ ଏହି କଥା
ରହିବ ଅମର ଜିତି ଏ ସମର
ଉଚ୍ଚେ ଟେକିଥାଅ ମଥା ।
ବୀର ପ୍ରସବିନୀ ଆଶ୍ୱସ୍ତି ଲଭିନି
ହରାଇଛି ଯେତେ ପୁଅ
ତହୁଁ ଦଶଗୁଣ ଶତ୍ରୁ ମାରି ପୁଣ
ଚରଣେ ତାହାର ଥୁଅ ।
ଧନ୍ୟ ତୁମ ଶକ୍ତି ଦେଶ ଅନୁରକ୍ତି
ଦୁଃସାହସ ଭରା କର୍ମ
ଭାରତର ରତ୍ନ ସୀମାନ୍ତର ଯତ୍ନ
ପରମ ପାବନ ଧର୍ମ ।
କୋଟି ଜନତାର ରକ୍ଷୀ ଅବତାର
ତୁମେ ଅମୃତର ସୁତ
ଜାଗି ବର୍ଷମାସ ରଣେ ଦେଇ ଝାସ
ହୋଇନାହଁ ଲକ୍ଷ୍ୟଚ୍ୟୁତ ।
ଲୋକଙ୍କର ସୁଖେ ଶତ୍ରୁର ସମ୍ମୁଖେ
ନିଜ ସୁଖ ଦିଅ ବଳି
ଗୁଣଗାନ କଲେ ପାରିବୁ କି ଭଲେ
ତୁମ ମହାନତା କଳି ।
ଆତ୍ମୀୟ ବଦନ ନଦେଖି ସଦନ
ତେଜି ସିନା ଥାଅ ଦୂରେ
ତୁମ ପାଇଁ ସର୍ବ ହୃଦୟରେ ଗର୍ବ
ଏ' ମାଟିର ଗ୍ରାମପୁରେ ।
ରଖିଛୁ ଭରସା ଆଗ୍ନେୟ ବରଷା
ଫୁଟାଇବ ଶତ୍ରୁ ଆଖି
ନିର୍ଭୟରେ ଯାଇ ଜିତିବରେ ଭାଇ
ମାଟିମାଆ ଅଛି ସାକ୍ଷୀ ।
ତୁମ ଦେଶସେବା ପ୍ରାଣବଳି ଦେବା
ଶୁଣି ଉଠେ ଶିହରଣ
ନ ଆସୁଣୁ ପାଶ ଶତ୍ରୁ ଯିବେ ନାଶ
ବୃଥା ହେବ ନାହିଁ ପଣ ।