ଓଡ଼ିଆ ଜାତିର ଲଢୁଆ ବୀର-30: ରିଣ୍ଡୋ ମାଝୀ
ଓଡ଼ିଆ ଜାତିର ଲଢୁଆ ବୀର-30: ରିଣ୍ଡୋ ମାଝୀ
ସ୍ଵରାଜ୍ୟ ମନ୍ତ୍ର କର୍ଣ୍ଣେ ଫୁଙ୍କିଲେ ସଂଗ୍ରାମୀ ନେତା ତିଳକ,
ସେ ପ୍ରତିଧ୍ଵନିରେ କମ୍ପି ଉଠିଲା ଭର୍ଲାଦାନୀ ମୂଲକ ।
କଳାହାଣ୍ଡିର କ୍ରୋଧ ବଢିଲା ବହ୍ନି ହେଲା ଦହନ,
ଗର୍ଜି ଉଠିଲା କନ୍ଧ ସମାଜ କରିଲେ ଯୁଦ୍ଧ ଆହ୍ଵାନ ।
ବନ୍ଧୁକ ମୂନେ ଶବର ନେତା ଦଣ୍ଡସେନା ଟଳିଲେ,
କନ୍ଧ ଯୁବକ ରିଣ୍ଡୋ ମାଝୀକୁ ଫିରିଙ୍ଗି ସେନା ଡରିଲେ ।
ରସୁଲକୋଣ୍ଡା କଇଦିଖାନା ତା’ପାଇଁ ହେଲା ତିଆର,
ମେରିଆ ବଳି ଅଭିଯୋଗରେ ବନ୍ଦୀହେଲେ ସର୍ଦ୍ଦାର ।
ଭାରତମାତାର ଜୟଧ୍ଵନିରେ ବନାଞ୍ଚଳ ହେଲା ଝଙ୍କୃତ,
କନ୍ଧ ସମାଜେ ମୁକ୍ତିଦାତାରେ ରିଣ୍ଡୋ ହେଇଲେ ସ୍ଵୀକୃତ ।
ଆତଙ୍କବାଦୀ କପଟ ପଣେ ମ୍ୟାକନିଲ ସାହେବ,
ମିଥ୍ୟା ପ୍ରଚାରେ ଶୁଣେଇଦେଲେ ରିଣ୍ଡୋ ମୁକ୍ତି ପାଇବ ।
ଉଠି ଆସିଲେ କ୍ଷେତରୁ ଚାଷୀ ପଥ ହୁଡ଼ିଲେ ପଥିକ,
ରିଣ୍ଡୋ ମାଝୀର ସ୍ଵାଗତ ପାଇଁ ଶ୍ରମ ଛାଡ଼ିଲେ ଶ୍ରମିକ ।
ହାଏରେ ହାଏ ମୁକ୍ତି କାହିଁ ମିଥ୍ୟା ଖାଲି ପ୍ରଚାର,
ଅଣ୍ଟାରେ ବେଡ଼ି ହାତରେ କଡ଼ି ପ୍ରହାର ପରେ ପ୍ରହାର ।
ଶସ୍ତ୍ରଧାରୀ ପୁଲିସ ବାହିନୀ ଅତ୍ୟାଚାର ଅସହ୍ୟ,
ରକ୍ତଭିଜା ନିର୍ଯ୍ୟାତନା ମନକୁ କରେ ଅଥୟ ।
ଗର୍ଜି ଉଠିଲେ ଯୁବ ବାହିନୀ ଧନୁ-ତୀରକୁ ସଜେଇ,
ମାତି ଉଠିଲେ କୁଟିଆ କନ୍ଧ ଟାଙ୍ଗିଆ ଖଣ୍ଡା ପଜେଇ ।
ମିଥ୍ୟାବାଦୀ ମ୍ୟାକଲିନ ସାଜିଲା କ୍ରୂର ସମନ,
ଅସ୍ତ୍ରଧାରୀ ସୈନ୍ୟ ଧରି କଲା ବିଦ୍ରୋହ ଦମନ ।
ଭର୍ଲାଦାନୀ ରଣକ୍ଷେତ୍ରରେ ଛୁଟିଲା ରକ୍ତ ଜୁଆର,
ସତର ଜଣ ବୀର ବିପ୍ଳବୀ ହେଲେ ପୁଲିସ ଆହାର ।
ସର୍ଦ୍ଦାର ମାଝୀ ପଡ଼ିଲେ ଟଳି ଗୁଳି ବାଜିଲା ବକ୍ଷରେ,
ରିଣ୍ଡୋ ନାମକୁ ଇତିହାସ ଲେଖିଲା ସ୍ଵର୍ଣ୍ଣ ଅକ୍ଷରେ ।