ଓଡ଼ିଆ ଜାତିର ଲଢୁଆ ବୀର-18: ପାପଡ଼ାହାଣ୍ଡି

ନବରଙ୍ଗପୁର ତାରାଗାଆଁ ପାଖ ଆମ୍ବତୋଟା ଗୁମାଗୁଡ଼ା,

ସଭା ମଣ୍ଡପରେ ଶହଶହ କାନ୍ଧରେ ଚାଉଳ ଚୂଡ଼ା |

ପାପଡ଼ାହାଣ୍ଡିର ଟୁରୀନଦୀ କୂଳେ ବଡ଼ ସମାବେଶ ହେବ,

ମାଧବ ପ୍ରାଧାନୀ ଆଦିବାସୀ ନେତା ନୂଆବାଟ ଦେଖାଇବ |

ଆଗେଇଲେ ନେତା ଭାଙ୍ଗିଦେବା ପାଇଁ ପାପଡ଼ାହାଣ୍ଡି ପୋଲ,

ଜନ ସମୁଦ୍ରକୁ ଦେଖିଲେ ପୁଲିସ ପାଇଲେଣି ଥଳକୂଳ |

କଳାନାଗ ନାମେ କୁଖ୍ୟାତ ନାଇଡୁ ପୁଲିସ ବାହିନୀ ଧରି,

ଟୁରୀନଦୀ କୂଳେ ଡେରା ପକାଇଲେ କରିଦେବେ ନାହିଁ ପାରି |

ପ୍ରାଧାନୀ ଡାକରେ ଆଗେଇଲେ କର୍ମୀ ନମାନି ପୁଲିସ ମାଡ଼,

କଳାନାଗ ପୁଣି ଉଠାଇ ବନ୍ଧୁକ ଆଦେଶିଲା ଗୁଳି ଛାଡ଼ |

ବନ୍ଧୁକ ଗର୍ଜିଲା ଗୁଡ଼ମ ଗୁଡ଼ମ ଆତଙ୍କ ଗଣିଲେ ନେତା,

ପଳାଇ ଯିବାକୁ ବାଟ ନ ମିଳାଇ କେତେ ହରାଇଲେ ଚେତା |

ଜୀବନ ବିକଳେ ଡେଇଁ ନଦୀଜଳେ ହରାଇଲେ କେତେ ପ୍ରାଣ,

ନଦୀପଠା ପରେ ମରି ପଡ଼ିଥିଲେ ବୀର ଊଣେଇଶ ଜଣ |

ମଙ୍ଗୁଳୁ ଭତରା, ବୁଦୁ ଅମାନତ, ରତନ ପୂଜାରୀ, ବଳି,

ପରମାନନ୍ଦ ସେ ସାହୁଘର ପିଲା ଗୁଳିରେ ପଡ଼ିଲେ ଢଳି |