ଲାଇବ୍ରେରୀ
ପ୍ରୋଫାଇଲ୍
ଓଡ଼ିଆ କବିତା ପଢ଼ା ବହି
ଓଡ଼ିଆ କବିତା ପଢ଼ା ବହି
ପୃଷ୍ଠାଟିଏ ଓଲଟାଇ ଦେଖିଲେ
ସ୍ମରଣକୁ ଆସିଯାଏ
ତାର କଥାବସ୍ତୁ ଟୀକା ଟିପ୍ପଣୀ
ହୋଇଥାଏ ଯଦି ସେ ଗୋଟାଏ
ପୂର୍ବ ପଠିତ ପଢ଼ା ବହି
ପୁରୁଣା ପାଠର ହୁଏ ପୁନରାବୃତ୍ତି
ଆଗକୁ ପଢ଼ିବାର ବଢ଼େ ଉତ୍ସାହ
ରଖି ହୁଏ ପୂର୍ବାପର ସଂପର୍କ
ପରବର୍ତ୍ତୀ ପ୍ରସଙ୍ଗ
ବୁଝିବା ହୁଏ ସହଜ ପ୍ରାଞ୍ଜଳ
ପାଠର ଜଟିଳତାକୁ ସେ
କରି ଦିଏ ସରଳ ବୋଧଗମ୍ୟ
ପଢ଼ା ବହିର ଆଧାରରେ
ଶିକ୍ଷକଙ୍କ ବିନା ବି ପଢ଼ି ହୁଏ
କେତେକ ଅପଢ଼ା ବହିର ପୃଷ୍ଠା
ଜୀବନ ବି ସେମିତି ଏକ ପଢ଼ା ବହି
ବିତି ଥିବା ଅତୀତର ଦିନ ଗୁଡ଼ିକ
ଗୋଟିଏ ଗୋଟିଏ ପୃଷ୍ଠା
ସବୁବେଳେ ସ୍ମରଣ କରାଇ ଦିଏ
ପୂର୍ବର ଅନୁଭୂତି ଅଭିଜ୍ଞତା
ଭବିଷ୍ୟତ ପାଇଁ ଦିଏ ଆହ୍ଵାନ
ଆଖି ଆଗରେ ଦେଖାଏ
ଆଲୋକର ଆଭାସ
ମନରେ ଦୃଢ଼ତା ଯାଏ ଭରି
ପଢ଼ା ବହିକୁ ପୁଣିଥରେ ପଢ଼ି
ସ୍ମରଣ କରିବାକୁ ହୁଏ
ଭୁଲି ଯାଇଥିବା ଅଂଶ କିଛି
ପଠନ ଚିନ୍ତନ ବ୍ୟତିରେକ
ଅନୁଶୀଳନୀର ଲିଖନ ପାଇଁ
ସ୍ଵଧ୍ୟାୟର ଆବଶ୍ୟକତା ଅଧିକ
ପଢ଼ା ବହି ଏକ ସହାୟକ ମାତ୍ର
ତା' ସାଥେ ସଂପର୍କ
ରଖିବାକୁ ହୁଏ ନିୟମିତ
ଦେଇ ଥାଏ ପ୍ରେରଣା
ଉପସ୍ଥାପନାରେ ହୁଏ ତାର
ଲବ୍ଧଜ୍ଞାନର ପ୍ରୟୋଗ
ଜୀବନ ରୂପକ ପଢ଼ା ବହିକୁ
ଯିଏ ଯେତେ ଅଧିକ ଥର
ମନଯୋଗରେ ପଢ଼େ
ସେ ସେତିକି ପ୍ରବୀଣ ଅଭିଜ୍ଞ
ଏ ପଢ଼ା ବହିରୁ ସଂପର୍କ
ଦେଲେ ତୁଟାଇ
ପ୍ରସଙ୍ଗର କଥାବସ୍ତୁ
ମନରୁ ଯାଏ ଦୂରେଇ
ପୁନର୍ବାର ପଢ଼ିବାକୁ ଲାଗେ
ଭାରି ଜଟିଳ କ୍ଳିଷ୍ଟ
ଭୁଲ୍ ହୋଇଯାଏ ସବୁ ପାଠ।
