ନୂଆଖାଇ

ପଶ୍ଚିମ ଆକାଶେ ବିହଙ୍ଗ ମୁଖର

ଭୁଲି କାଲି ବିଭାଜନ 

ଓଠେ ସଜଫୁଟା ହସର ଜୁଆର

ମନ ପୂତ ପାରବଣ ।

ସଭିଙ୍କ ଆଖିରେ ପ୍ରୀତିରେ ଲୋତକ

ଶୋଭାମୟ ହୃଦ ପ୍ରାଣ 

ବହୁଅଛି ନଈ ମିଠା ଗୀତ ଗାଇ

ନୂଆଖାଇ ଶିହରଣ ।

ବନ୍ଧୁ ପ୍ରିୟଜନ ଭାବର ଛୁଆଁରେ 

ସରାଗର ସୁଧାବାରି 

ଘରେ ଘରେ ରାସ ଅପୂର୍ବ ରୋଷଣୀ

ଘନ ତମିସ୍ରାକୁ ଚିରି ।

ପହିଲି ପୁଲକ ଚାଷୀର ମହକ

ଅମଳ ଆଘ୍ରାଣ ପାଇ 

ଇଷ୍ଟଦେବୀଙ୍କୁ ସେ ସମରପି ଦିଏ

ଭାବ ଗଦଗଦ ହୋଇ ।

ନବାନ୍ନର କ୍ଷୀରି ପରଶେ ଦେହୁରୀ

ପୂର୍ବଜଙ୍କ ସୁମରଣେ 

ବିତରେ ସେ ସର୍ବେ ପ୍ରଭୁ ଲାଗି ଭୋଗ

ପୁଲକିତ ଶିହରଣେ । 

ଦିବ୍ୟ ନବାନ୍ନର ମଧୁ ପରଶରେ 

ସୁଖ ସ୍ଵପ୍ନ ଜହ୍ନ ଛାଇ 

କୁହୁକ କାକଳି କମଳିନୀ ଶୋଭା

ପଶ୍ଚିମୀର ସୁନାଭୂଇଁ ।

ନୂଆଖାଇ ବାସି ପାଳନ 'ତିଆସି' 

ସମ୍ମିଳିତ ଗ୍ରାମବାସୀ  

ମନୋରଞ୍ଜନର ନବ ଇସ୍ତାହାର 

ଆକର୍ଷଣ ବାରମାସୀ ।

ନୂଆଖାଇ ମୋର ଆମର ପରବ 

ଗରବର ନୀଳଭେଟି  

ବିଶ୍ଵ ଭ୍ରାତୃତ୍ୱର ମଳୟ ଛୁଆଁରେ 

ବାସମୟ ହୃଦକୋଠି ।