Library
ନାରୀ
ନାରୀ
ପ୍ରକୃତ ନାରୀଟି ସଂସାରରେ ସିଏ
ମୁହେଁ ସଦା ହସ ହସ
ପ୍ରେମ ସ୍ନେହ ଡୋରେ ବାନ୍ଧି ରଖିଥାଏ
ସଂସାରକୁ କରି ବଶ
ପ୍ରକୃତ ନାରୀ ସେ ରୂପ ଯାହା ହେଉ
ହେୟ ବୋଲି ମନେ ଭାବି
ଶିକ୍ଷା ପ୍ରାପ୍ତ କରି ସାମାଜ ପାଇଁକି
ଖୋଲେ ସଫଳତା ଚାବି
ପ୍ରକୃତ ନାରୀ ସେ ଜନ୍ମରୁ ମୃତ୍ୟୁକୁ
ଦୁଇ କୂଳକୁ ସେ ହିତା
ତାର ପରଶରେ ମିଠା ହୋଇଯାଏ
ଭାବ ଯଦି ଥାଏ ପିତା
ପ୍ରକୃତ ନାରୀ ସେ ଅନ୍ୟ ସନ୍ତାନକୁ
ଆଦରେ ଆପଣା ଜଣେ
ଦୁଃଖୀ ପିଲା ଦେଖି ହୃଦ ତାର କାନ୍ଦେ
ନିଜ ପିଲା ଭଳି ମଣେ
ପ୍ରକୃତ ନାରୀ ସେ ଦରକାର ହେଲେ
ବୀରାଙ୍ଗନା ଟିଏ ସାଜି
ନିଜ ଜୀବନକୁ ଦେଶ ପ୍ରୀତି ପାଇଁ
ଲଗାଇ ଦିଏ ସେ ବାଜି
ପ୍ରକୃତ ନାରୀ ସେ ସୀମାର ମଧ୍ୟରେ
ରହି ଆଲୋକ ସେ ଦିଏ
ସେଇ ଆଲୋକରେ ଦୁଇକୁଳ ପାଇଁ
ସମ୍ମାନ ଆଗେଇ ନିଏ
ପ୍ରକୃତ ନାରୀ ସେ ଅନ୍ଯାୟ ଦେଖିଲେ
ମାଆ ଦୁର୍ଗା ରୂପ ଧରି
ପାପୀ କୁ ଅଚିରେ ନାଶ କରିଦିଏ
ଅସୀମ ସାହସ ଭରି
ପ୍ରକୃତ ନାରୀ ସେ ସମାଜରେ ଜାଣ
ଦେବୀର ସ୍ଵରୂପ ସାଜି
ପରମ୍ପରା ସଙ୍ଗେ ସଂସ୍କୃତି ପାଇଁକି
ଜୀବନ ଲଗାଏ ବାଜି
ପ୍ରକୃତ ନାରୀ ସେ ହୃଦୟ ଯାହାର
ବିଶାଳ ସାଗର ପରି
ସେଥିପାଇଁ ସିଏ ସବୁଠାରୁ ଉଚ୍ଚ
ମାଆର ନାମକୁ ଧରି
ପ୍ରକୃତ ନାରୀ ସେ ଲାଜ ଆଭୂଷଣେ
ମୁଖେ ରଖେ ମିଠା ହସ
ପ୍ରତିଦାନେ ପୁଣି ସଂସାର ପାଇଁକି
ବାଣ୍ଟଇ ମମତା ରସ
----------------------------------------
#ଅମୂଲ୍ୟ_କୁମାର_ପଣ୍ଡା
ଅରଙ୍ଗାବାଦ, ବରୀ, ଯାଜପୁର
