"ମୃତ୍ୟୁ "

ଜୀବନର ଅନ୍ୟ ଏକ ନାମ 

ଯେଉଁଠି ଜୀବନ ସେଇଠି ହିଁ ମୃତ୍ୟୁ 

ଜୀବନକୁ ନେଇ ମୃତ୍ୟୁ 

ଆଉ ମୃତ୍ୟୁକୁ ନେଇ ଜୀବନର ପରିକଳ୍ପନା 

ଜନ୍ମ ମୃତ୍ୟୁର ବୃତ୍ତ ଚକ୍ରରେ 

ଜୀବନ ଯଦି ସୃଷ୍ଟି ହୁଏ 

ମୃତ୍ୟୁ ହେଉଛି ବିନାଶ 

ଚକ୍ଷୁର ଅଦୃଶ୍ୟ ପଟଳରେ 

ମୃତ୍ୟୁ ତା'ର ଧାବମାନ 

କ୍ଷୀର ଲୋଭରେ 

ଧେନୁ ପଛେ ପଛେ ବତ୍ସା ଯେମିତି ଧାଉଁଥାଏ 

ଠିକ୍ ସେଇପରି 

ବୋଧ ହୁଏ 

କେଉଁ ଏକ ଅଦୃଶ୍ୟ ଶକ୍ତିର ନିର୍ଦେଶନାମାକୁ 

ପରିପାଳନ କରିବାର ଏକ ତୀବ୍ର ଦାୟିତ୍ୱବୋଧକୁ ନେଇ 

ଜୀବନ ପଛେ ପଛେ ମୃତ୍ୟୁ ବି ସେମିତି ଧାବମାନ l

ଜଣା ନାହିଁ 

ଜୀବନର ଶେଷ ପର୍ବ 

କେଉଁଠି, କେତେବେଳେ, ପୁଣି କେଉଁ ମୁହୂର୍ତ୍ତରେ 

ନା ତୁମେ ଜାଣିଛ ନା ମୁଁ ଜାଣିଛି 

ଏ ମୃତ୍ୟୁର ଠିକଣା 

ନା ତୁମେ ଦେଖିଛ ନା ମୁଁ ଦେଖିଛି 

ଏ ମୃତ୍ୟୁର ଅବୟବ ଆଉ ତା'ର ପ୍ରଦକ୍ଷିଣା l

ତେଣୁ ଏ ଦୁନିଆ ହେଉଛି 

ଛାଇ-ଆଲୁଅର ଏକ ମୁକ୍ତ ରଙ୍ଗମଞ୍ଚ 

ଆଉ 

ଦୁଇଟି ନିଆଁର ପରିଭାଷା 

ଗୋଟିଏ ଏନ୍ତୁଡ଼ି ଶାଳରେ 

ଆଉ ଗୋଟେ ମଶାଣି ଭୂଇଁରେ

ବାକି ସବୁ ସତ-ମିଛ ଅଭିନୟ l