ମଲ୍ଲି ଢଅପ

ରଜାପୁଅ ଆଉ ରାଜା ହେବ ନାହିଁ

      ରାଜତନ୍ତ୍ର ହେବ ବିଲୋପ ,

ସୁଗଣତନ୍ତ୍ର ର ପ୍ରତିଷ୍ଠା କରିବା

       ଦେଖାଇ ନିଜର ବହପ ।

ଅପାଠୁଆ ଡାକି ଗାଦିରେ ବସେଇ

        କରିବା ମଧୁର ଆଳାପ 

            ମଲ୍ଲି ଢଅପ ।

ପାଠୁଆ ଯେତେକ ହାଟୁଆ ସାଜିବେ

        ପାଠକୁ କରିବେ ବିକିରି ,

ଟିପ ଦିଆ ଲୋକ ହାଟର ମାଲିକ

        ଜ୍ଞାନୀ କରିଥିବେ ଚାକିରି।

ମୁଣ୍ଡ ବିକ୍ରି ହେଉ ଚିନ୍ତା ଦକ ନାହିଁ

        ହେଉ ପଛେ ଲାଭ ଅଳପ

            ମଲ୍ଲି ଢଅପ ।

ଖଟ ମୁଣ୍ଡେଇବେ ସୁଜ୍ଞାନୀ ବିଜ୍ଞାନୀ

      ମୁଣ୍ଡ ଖଟେଇବେ ମୂରୁଖା ,

ଅଜ୍ଞାନୀ ପିନ୍ଧିବେ ପାଇଜାମା କୁର୍ତା

     ଜ୍ଞାନୀ ଚଳେଇବେ ଚରଖା ।

ଖଟି ଖିଆ ଯାଉ ଦାଦନେ ଖାଦନେ

       ବନ୍ଧା ପଡ଼ୁ ପୁଅ ମାଇପ

           ମଲ୍ଲି ଢଅପ । 

ପାଠ ପଢ଼ି ପୁଅ ଚାକିରି କରିବ

       ସ୍ବପ୍ନ ଦେଖେଇବା ବିରାଟ ,

ଚାକିରି ନପାଇ ହଳ କରିବ କି

       ବରଂ ଚାଲି ଯିବ ସୁରଟ ।

ବଢ଼ିଲା ଝିଅଟା ବଢ଼ିବା ପାଇଁକି

     ହେଲେ ହେଉ ଥାଉ ଖରାପ

           ମଲ୍ଲି ଢଅପ ।

ନାରୀକୁ ଖରାପ ନକହି ଭାବିବା

         ନିଜ ପୁତ୍ର ର ଜନନୀ ,

ନାରୀ ଉନ୍ନତିରେ ଦେଶର ଉନ୍ନତି

       ଭାଷଣର ମିଛ କାହାଣୀ ।

ପର ଝିଅ ବୋହୂ ନିଜ ଝିଅ ସମ

        ଭାବିଲେ ଲାଗିବ ପାପ

             ମଲ୍ଲି ଢଅପ ।

ଗଣତନ୍ତ୍ର ର ପୃଷ୍ଠା ଲେଉଟାଇ

         ଗଣିକା କରଇ ଚର୍ଚ୍ଚା ,

କିବା ଯାଏ ଆସେ ରାସ୍ତା କଡ଼େ ପଡ଼ି

      ନାବାଳିକା ହେଲେ ମୂର୍ଚ୍ଛା ?

ବାପ ହେଇ ଯଦି ପାପ କରି ବସେ

        କିଏବା କରିବ ନିଶାପ

            ମଲ୍ଲି ଢଅପ ।

ସ୍ବୟଂ ସହାୟିକା ସ୍ବୟଂ ସିଦ୍ଧା ଆମେ

       ସ୍ବାଧୀନ ଦେଶର ନାରୀ ,

ଭଲ ଲାଗୁ ନାହିଁ ନଗ୍ନ ପିଠି ପେଟ

         ବକ୍ଷୁ ବସ୍ତ୍ର ଦେବୁ ଚିରି ।

ରକ୍ତ ପିଇ ଯିବୁ ଚରିତ୍ରେ ଆମର

         ଲଗେଇବ ଯିଏ ଟିପ

             ମଲ୍ଲି ଢଅପ ।

ବାପ ଖୋଜେ ମାଟି ପୁଅ ଖୋଜେ ଭାଟି

      ମାଅାକୁ ରେସନ ଚାଉଳ ,

ନୋଟ୍ ଦେଇକି ଭୋଟ୍ କିଣିବା

       ନୂଆ ଗଣତନ୍ତ୍ର କୌଶଳ ।

ଗରିବ ମରିବ ମଲେ ତ ବଢ଼ିବ

        ଧନୀର ତ ଧନ ଅମାପ

             ମଲ୍ଲି ଢଅପ ।

ସରକାର ଆଉ ସରକାରୀ ବାବୁ

         ବ୍ରିଟାନିଆ ଫିପ୍ଟି ଫିପ୍ଟି ,

ସରକାରୀ କାମ କେମିତି ବା ହେବ

       ନ ନେଇ ଲାଞ୍ଚ କି ବଟି ?

ତୁ ତ ମୁତୁରି ମୁଁ ତ ମୁତୁରି 

    କିଏ କାହାକୁ ବା ଦେବ ଶାପ

            ମଲ୍ଲି ଢଅପ ।

ଯୋଜନ ଯୋଜନ ଯୋଜନା ବୁଲିବ

     ଗୋଟେ ବି ହେବନି ସଫଳ,

ନିର୍ବାଚନ ବେଳେ ଇସ୍ତାହାର ପଢ଼ି

       ପରିବାର ହେବ ଦି'ଫାଳ ।

ସରକାରୀ ମାଲ୍ ଦରିଆ ମେଁ ଡାଲ୍

      ଯେତେ ପାର କର ହଡ଼ପ

     କରି ରାଜତନ୍ତ୍ର ର ବିଲୋପ

             ମଲ୍ଲି ଢଅପ ।