ମିଠା ମିଠା
ମିଠା ମିଠା
ମିଠା ଲାଗେ ଭାରି ତା ମୂରଲୀ ସ୍ଵନ
ମିଠା ତା ତ୍ରିଭଙ୍ଗୀ ଠାଣି
ମିଠା ଲାଗେ ରାଧା ଅଣ୍ଟା ଭଙ୍ଗା ଚାଲି
ଭରିବାକୁ ଗଲେ ପାଣି
ମିଠା ଲାଗେ ଭାରି ଶିଶିର ଟୋପା ଲୋ
ମିଠା ଶୀତୁଆ ସକାଳେ
ମିଠା ଲାଗେ ରବି କଅଁଳ କିରଣ
ସୂର୍ଯ୍ୟମୁଖୀ ହସୁଥିଲେ
ମିଠା ଲାଗେ ଭାରି ଛୋଟ ଶିଶୁଟିର
ହସ କଅଁଳ ଓଠର
ମିଠା ଲାଗେ ତାର ମାଆ ମାଆ ଡାକ
ଶୈଶବର ଆଦ୍ୟ ସ୍ୱର
ମିଠା ଲାଗେ ଭାରି ଶୁଭ୍ର କାଶତଣ୍ଡି
ପାର୍ବଣରେ ଯେବେ ହସେ
ମିଠା ଲାଗେ ମୋତେ ଫେରନ୍ତା ନିରଦ
ନୀଳ ଶରତ ଆକାଶେ
ମିଠା ଲାଗେ ଭାରି ସିନ୍ଦୂର ଟୋପା ଲୋ
ସୁହାଗିନୀ ସିମନ୍ତରେ
ମିଠା ଲାଗେ ପୁଣି ସେ ସିନ୍ଦୂର ଟୋପା
ବିଜୟୀର ଲଲାଟରେ
ମିଠା ଲାଗେ ଭାରି ଦୂର ପରବତ
ସୁଗଭୀର ପାରାବାର
ମିଠା ଲାଗେ ମୋତେ ପାହାନ୍ତି ସୂରୁଜ
ଗିରି କାନନ କୁଞ୍ଜର
ମିଠା ଲାଗେ ଭାରି ନବ ବଧୂ ଲାଜ଼
ନବ ପ୍ରଣୟ ପୀରତି
ମିଠା ଲାଗେ ମୋତେ ସାଗରେ ସାଇତା
ଶାମୁକା ଗରଭେ ମୋତି
ମିଠା ଲାଗେ ଭାରି ମରତ ଭୂଇଁରେ
ମାତୃଭୂମି ମାତୃଭାଷା
କାଳିଆର ନେତ ମୋ ବୋଉ ପଣତ
ମିଠା ତା ପଖାଳ କଂସା
ମିଠା ଲାଗେ ଭାରି ରଜ ଖିଲିପାନ
ମିଠା ଆମ ପୋଡ଼ପିଠା
ମିଠା ଲାଗେ ଆମ୍ବତୋଟା ଦୋଳିଖେଳ
ସାଙ୍ଗ ସାଥିଙ୍କର ଥଟ୍ଟା
ମିଠା ଲାଗେ ଭାରି ଆଦ୍ୟ ଆଷାଢ଼ର
ପ୍ରଥମ ବରଷା ବିନ୍ଦୁ
ମିଠାରେ ମିଠାରେ ଘେନ ମୋ ପ୍ରଣତି
ନୀଳାମ୍ବର ନୀଳସିନ୍ଧୁ
ଆହେ
ନୀଳାମ୍ବର ନିଳସିନ୍ଧୁ