ମିଇଁ ମିଇଁକା

ମିଇଁ ମିଇଁକା ମାଣିକ ରାଜା ନାଆଁଟି ମୋର ଛେଳି

ଶିଙ୍ଗରେ ମୋର ବହୁତ ବଳ ପାହାଡ଼ ଦେବି ଟାଳି ।

କଳା ମାଣିକ ପୁଅ ମୋହର ବାହା ହୋଇବ ଆଜି

ଅମୁକ ଗାଆଁ ସମୁକ ଝିଅ ଆସିବ ବୋହୁ ସାଜି ।

ମୋ" ପରିବାର ବନ୍ଧୁ ବାନ୍ଧବ ସଭିଏଁ ଛନ୍ତି ମିଳି

ଭୋଜିଭାତରେ ସାଙ୍ଗ ସାଥୀରେ ଘରଟା ଯାଏ ପୁରି ।

ଦାଢ଼ି ଆଉଁସି ଶିଙ୍ଗକୁ ଟେକି କହେ ମାଣିକ ରାଜା

ବର ଯାତିରୀ ଯିବା ପାଇଁକି କରରେ ସବୁ ସଜା ।

ମାଙ୍କଡ ଧରୁ ବିଜୁଳି ବତୀ ବିଲୁଆ ଫୁଙ୍କୁ ତୁରୀ

ଠେକୁଆ ଫୁଲ,କୁକୁର ଢୋଲ,ଭାଲୁ ଚଳାଉ ଗାଡି।

ବାଣ ମାରିବ ନେଉଳ ଭାଇ ଗଧ ବୋହିବ ଭାର

ପୁଷି ମାଉସୀ ନାଚ କରିବ ଘୋଡାରେ ଯିବ ବର ।

ବାଜା ବାଜିଲା ରୋଷଣୀ ହେଲା ଚାଲିଲା ପଟୁଆର

ଘୋଡାରେ ଚଢି କଳା ମାଣିକ ସାଜିଛି ଦେଖ ବର ।

ଚାଲିଲା ଗାଡି ଶଶୁର ବାଡ଼ି ସଙ୍ଗୀତ ତାଳେ ତାଳେ

ପୁଷି ମାଉସୀ ନାଚ କରୁଛି ବର ଯାତିରୀ ମେଳେ ।

ହେଣ୍ଟାଳ ଦେଲା ମହାବଳଟା ମଝି ଜଙ୍ଗଲେ ଆସି

ମିଇଁ ମିଇଁକା କଳା ମାଣିକ ଘୋଡ଼ାରୁ ଗଲା ଖସି ।

ଯିଏ ଯୁଆଡେ ପଳାଇଗଲେ ମହାବଳ କୁ ଦେଖି

ମିଇଁ ମିଇଁକା ମାଣିକ ରାଜା ଧାଇଁଲା ଲାଞ୍ଜ ଜାକି ।

କେଡେ ଗାରିମା ଦେଖାଉଥିଲା ମାଣିକରାଜା ଛେଳି

ପୁଅ ତାହାର ବୁଢା ହୋଇଲା କାନ୍ଦିଲା ଆଖି ମଳି ।