ମିଛ ଏକ ମିଠା ଜହର

ସବୁଜ ବନର ମାୟା ଭରିଦେଇ

    କଥା ଦେଇଥିଲ ମୋତେ,

ରହିବ ସାଥିରେ ଜୀବନ ତମାମ

    ବାହାହୋଇ ମୋତେ ପଛେ |

କହିଥିଲ ତୁମେ କାନେ ତୁନି ତୁନି

    ମୋତେ ଭଲପାଅ ବୋଲି,

ଛାତିରେ ମୋହର ଢଳି ପଡୁଥିଲ

    ମନରେ ସରାଗ ବୋଳି |

ତୁମପାଇଁ ପରା ହୃଦୟେ ଭରିଲି

   ଅସୁମାରୀ ପ୍ରୀତି ଆଶା,

ମନ ଉପବନେ ମହକି ଉଠିଲ

    କବିତାରେ ମୋର ଭାଷା |

ଦେଖିଲି ତୁମକୁ ଦିନେ ଅନ୍ୟ ସାଥେ

   ବାଣ୍ଟୁଥିଲ ପ୍ରୀତି ତାରେ,

ଭାଙ୍ଗିଗଲା ମୋର ମନ ସେହିଦିନୁ

   ଅନୁତାପ ମନେ ଭରେ |

ତୁମ ମନେ ଯେବେ ଏତେ କଥା ଥିଲା

    ଅଭିନୟ କିମ୍ପା କଲ,

ଛଳନାରେ ମୋତେ ଭଲ ପାଇବାର

    କାମନା ଯେ ଭରିଦେଲ |

ମିଛ ଏକ ମିଠା ଜହର ଖୁଆଇ

    କି ସୁଖ ପାଇଲ ସତେ,

ତୁମ ଛଳନାର ବିଷର ପ୍ରକୋପ

    ଜାଳୁଛି ନୀରବେ ମୋତେ |

ହସରେ ତୁମର ମିଛ ଏକ ମିଠା

     ଜହର ପ୍ରଲେପ ଥିଲା,

ତୁମ ଅଧରର ସେ ସେ ମିଠା ଜହର

     ଚୁମ୍ବନେ ମୋତେ ଦଂଶିଲା |

ଜଳୁଛି ମୁଁ ତୁମ ଛଳନା ଜୁଇରେ

     ଶୂନ୍ୟ ହୃଦୟକୁ ଧରି,

ତୁମେ ଦେଇଥିବା ମିଛ ଏକ ମିଠା

     ଜହରକୁ ପାନ କରି |