ମହାନ ଆମର ପର୍ବପର୍ବାଣି

ମହାନ ଆମର ପର୍ବପର୍ବାଣି

ପିଠାପଣା କହେ ତା'ର କାହାଣୀ ।

ଗୋଟିଗୋଟି ହୋଇ ଛୁଟେ ଅଗଣା

ପାଛୋଟି ଆଣଇ ଗୃହ ଅଙ୍ଗନା ।

ସତେ କି ଭାବଇ ତାହାକୁ ମଣି

ଖୁସିର ବୀଜକୁ ହୃଦୟେ ବୁଣି ।

କେବେ ଝୋଟି ଚିତା କେବେ ମୁରୁଜ

ଗୃହଦିଅଁ ପାଶୁ ଚଉଁରା ସଜ ।

ଦୋଳ ପରବରେ ପିଠା ଏଣ୍ଡୁରି 

ଲାଗି ରାଧାକୃଷ୍ଣେ ମେଲଣେ ବୁଲି ।

ଚଇତି ମଙ୍ଗଳବାରେ ତାରିଣୀ

ଗେଟେଇ, କ୍ଷୀରିରେ ପୂଜନ ପୁଣି ।

କରେ ପୋଡ଼ପିଠା ପରବ ରଜେ

କାକରାକୁ କ୍ଷୀରି ଗୁହାଳ ନିଜେ ।

ଚିତାଲାଗି ଅମାବାସ୍ୟା ଚିତୋଉ

କେଡ଼େ ସୁଆଦିଆ ତିଆରେ ବୋଉ ।

ଗହ୍ମା ପୁନେଇଁରେ ଚକୁଳି ପିଠା

ଆରିସା, କାକରା ଆହା କି ମିଠା !

ଭାଦ୍ରବରେ ଶ୍ରୀଗଣେଶ ପୂଜନ

ନାନା ପିଠାପଣା, ଲଡୁ ଅର୍ପଣ ।

କୁଆଁରୀ କୁଆଁର ଛେନା ମଣ୍ଡାରେ 

ଗଜପିଠା ଭୋଗ ବଡ଼ ଓଷାରେ ।

ମଗୁଶିରେ ମାତା ଲକ୍ଷ୍ମୀଙ୍କ ପୂଜା

ପାଞ୍ଚପାଳି ନାନା ପିଷ୍ଟକ ସଜା ।

ହଳଦୀ ପତରେ ପିଠା ଏଣ୍ଡୁରି 

ମହମହ ବାସ ଛୁଟାଏ ଭାରି ।

ପୌଷ ଅମାବାସ୍ୟା ବକୁଳ ଲାଗି

ବଉଳ ଗଇଁଠା ଦିଅଁଙ୍କୁ ଲାଗି ।

ମଣ୍ଡା, ଅଟକାଳି ପଣ୍ଡୁ ପୂର୍ଣ୍ଣିମା

ଯିଏ ଚାଖିଥାଏ ଭୁଲେନି ଜମା ।

ମାଘେ ବାଗ୍ଦେବୀ ହୁଅନ୍ତି ଉଭା

ନାନା ଅନୁଷ୍ଠାନ ମଣ୍ଡିତ ଶୋଭା ।

ପରବ ଆମର ଗର୍ବ ଗୌରବ

ପାଳି ଓଡ଼ିଆଣୀ ମନାସେ ଶୁଭ ।

କାଳଚକ୍ରେ ଘୂରି ବରଷସାରା

ଆସିବା ଯିବାରେ ଦିଶଇ ତୋରା ।

ମହାପ୍ରଭୁ ଆମ ଶ୍ରୀଜଗନ୍ନାଥ

ପ୍ରତ୍ୟେକ ପରବେ ତୋଷେ ଭକତ ।

ପ୍ରତିଦିନ ତାଙ୍କ ଅଶେଷ ଲୀଳା

ସତେ କି ପରବେ ବସିଛି ମେଳା ।

ଦେଖି ଭକ୍ତ ମନ ଭାବରେ ଭୋଳା ।

ଧନ୍ୟ କଳାକାହ୍ନୁ ଧନ୍ୟ ତା' ଖେଳା ।