ମାୟା ସଂସାର

ମୋହ ମାୟା ଏଇ ସଂସାର ଭିତରେ

ଆପଣାର କେହି ନୁହଁ

ସ୍ୱାର୍ଥ ସାରିଗଲେ ସମସ୍ତେ ଫେରିବେ

ଅନେଇବେ ନାହିଁ ମୁହଁ ।

ସମ୍ପର୍କର ମାନେ ପାଇବାର ଆଶା

ମିଳିବାର କିଛି ଥିବ

ମିଳିଗଲା ପରେ ସମ୍ପର୍କର ଡୋରି

ଆପେ ଆପେ ଛିଡିଯିବ ।

ସବୁ ଏଠି ମୋହ ସବୁ ଏଠି ମାୟା 

ସବୁ ଯେ ଅଢେଇ ଦିନ

ସରିଗଲା ପରେ ସ୍ୱାର୍ଥ ସଭିଙ୍କର

ଫେରିଯିବେ ଗୋଟେ ଦିନ ।

ମିଛ ହସ ଏଠି ସଭିଙ୍କ ଓଠରେ

ନୂଆ ସମ୍ପର୍କକୁ ଗଢେ

ସ୍ୱାର୍ଥ ଯେତେଦିନ ପୂରଣ ତ ହୁଏ

ସମ୍ପର୍କ ସେତିକି ବଢେ ।

କେହି ରହିବେନି ଲୁହ ପୋଛିବାକୁ

ସମସ୍ତେ ଚାହିଁବେ ଦୁଃଖ

ଆସିବେ ସମସ୍ତେ ଖୁସି ଥିଲା ବେଳେ

ଥିବ ଯେତେବେଳେ ସୁଖ ।

ଉପରେ ତ ଭଲ କହି ବୁଲୁଥିବେ

ଭିତରେ କାଟିବେ ଚେର

ସରିଗଲା ପରେ ପଇସା ପାଖରୁ

କରିବେ ସଭିଏଁ ପର ।

ସାହାଯ୍ୟ ମାଗିଲେ କେହି ଆସିବେନି

କେତେ କଥା କହୁଥିବେ

କୁଅରେ ବେଙ୍ଗଟେ ପଡିଗଲା ପରେ

ପଥର ଯେ ମାରୁଥିବେ ।

ଅନ୍ଧ ହୋଇକରି ବିଶ୍ୱାସ କାହାକୁ

କରିଲେ ଖାଇବ ଧୋକା

ମାୟା ସଂସାରରେ କିଏ ବା କାହାର

ଖୋଜନ୍ତି ଖାଲି ମଉକା ।

ସଭିଏଁ ତ ଏଠି ସୁଖର ସାଥି ଯେ

ଦୁଃଖ ସାଥି କେହି ନୁହଁ

ଅନ୍ୟ ଖୁସି ଯେବେ ପୂରଣ ନ ହେବ

ଚାହିଁବେନି କେହି ମୁହଁ ।

ମାୟାର ସଂସାରେ ମୋହ ଲଗାଅନି

ସଭିଏଁ ତ ଏଠି ପର

ସଭିଏଁ ତ ଏଠି ସ୍ୱାର୍ଥ ପାଇଁ ବନ୍ଧା

କିଏ ବା ହେବ ନିଜର ।