ମାଣବସା

କାହିଁକି ଆଜି ଏ ଧରା ପୃଷ୍ଠରେ

  ଗହଳ ଚହଳ ଲାଗିଲା

ଚନ୍ଦନ କର୍ପୂର ବାସ ମହକିଲା

  ଶଙ୍ଖ ହୁଳହୁଳି କମ୍ପିଲା ।

ଶୁଭ୍ର ବର୍ଣ୍ଣ ଝୋଟି ପ୍ରତି ଦୁଆରରେ

  କେତେ ଚମତ୍କାର ଦିଶିଲା 

ଘନ କୁହୁଡିରେ ଶୀତ ପାହାନ୍ତିରେ

  ଗଗନ ପବନ କମ୍ପିଲା।।

କ୍ଷୀରି ଖେଚୁଡ଼ିର ବାସ୍ନା ମହକିଲା

  ଆକଣ୍ଠ ଗ୍ରାସିଲା ପବନ

ପୁର ପଲ୍ଲୀ ଠାରୁ ସହର ନଗର

  ପ୍ରକମ୍ପିଲା ଲକ୍ଷ୍ମୀ ପୁରାଣ ।

ଘରେ ଘରେ ନାରୀ ବସାଇଲେ ମାଣ

  ତାର ପାଖରେ ଧାନ ମେଣ୍ଟା

ପୂଜା ନୈବେଦ୍ୟରେ ଥାଳ ଭର୍ତ୍ତି କଲେ

  ଏ ଗୁରୁ ବାର ମାଣବସା।

ମାତା ପଦ୍ମାଳୟା ଆସିଲେ ଧରାକୁ

  ହୋଇଲା ମାର୍ଗଶିର ଧନ୍ୟ 

କୋଟି ପ୍ରଣିପାତ ଚରଣେ ମାତା ଗୋ

  ସର୍ବଦା ହୁଅ ତୁ ପ୍ରସନ୍ନ।।