ମାଆ ରଟନ୍ତୀ କାଳୀ
ମାଆ ରଟନ୍ତୀ କାଳୀ
ନିକୁମ୍ଭିଲା ଦେବୀ ପୁଜି ରାବଣର ସୂତ
ମେଘନାଦ ହୋଇଥିଲା ବଡ଼ ବଳବନ୍ତ l
ଦେବୀଙ୍କ ପ୍ରାସାଦୁ ଲଭି ଏକ ଦିବ୍ୟ ରଥ
ସେ ରଥେ ଚଢ଼ି ଇନ୍ଦ୍ରଙ୍କୁ କଲା ପରାଜିତ l
ଇନ୍ଦ୍ର ପରାଜିତ କରି ନାମ ବହେ ବୀର
ଇନ୍ଦ୍ରଜିତ ଅଜେୟ ସେ ରାବଣ କୁମର l
ଶତ ଚେଷ୍ଟା କରି ରାମାୟଣ ଯୁଦ୍ଧ କାଳେ
ରାମେ ବୀର ଇନ୍ଦ୍ରଜିତ ନିହତ ନୋହିଲେ l
ଭକ୍ତ ବିଭୀଷଣ ବତାଇଲେ ଏହା ଭେଦ
ନିକୁମ୍ଭିଲା ଯଜ୍ଞ ଭଙ୍ଗେ ଇନ୍ଦ୍ରଜିତ ବଧ l
ହନୁମାନଙ୍କ ସହାୟେ ବୀର ଶ୍ରୀଲକ୍ଷ୍ମଣ
ଇନ୍ଦ୍ରଜିତ ବଧହେଲା ଯଜ୍ଞ ହୋଇ ଭଗ୍ନ l
ପ୍ରଭୁ ଶ୍ରୀରାମ ଲଙ୍କାରେ ରାବଣ ସଂହାରି
ମାଆଙ୍କୁ ଘେନି ଆସିଲେ ଅବଧ ନଗରୀ l
ମାଘ କୃଷ୍ଣଚତୁର୍ଦ୍ଧଶୀ ସେ ଦେବୀଙ୍କ ପୂଜା
ରଟନ୍ତୀକାଳୀ ରୂପରେ ଖାନ୍ତି ବଳିଭୋଜା l
ଶ୍ରୀକ୍ଷେତ୍ର ପ୍ରବେଶପଥେ ମା'ବାଟମଙ୍ଗଳା
ନିକୁମ୍ଭିଲା ଦେବୀ ବସି କରୁଛନ୍ତି ଖେଳା l
ମେଘନାଦଙ୍କୁ ପ୍ରଦତ୍ତ ତାଙ୍କ ସେହି ରଥ
ଦେବଦଳନ ନାମରେ ସୁଭଦ୍ରାଙ୍କ ଖ୍ୟାତ l
ମାଆ ରଟନ୍ତୀ କାଳୀଙ୍କ ମହିମା ଅପାର
ତାଙ୍କ ଚରଣରେ ମୋର କୋଟିଏ ଜୁହାର l