Library
ଜୀବନ ନାଟକ
ଜୀବନ ନାଟକ
ଜୀବନ!
ଫେରିବାଲାର ସୁଡୁକାଏ ସ୍ଵପ୍ନ ଦାରୁଣ ଦର୍ଶନ
ମୁକୁଳା ନଇର ନିସର୍ତ୍ତ ଉତ୍ତରଣ ।
ସମ୍ପର୍କ ଏଠି କଣ? କିଏ ବୁଝେ??
ସକାଳ ହେଲେ ହଜାରେ ମୁହଁର ଭେଟ
ଖାଲି ମୂଲଚାଲ ମୁନାଫା ହିଁ ମୂଳ !
ତଥାପି
କେବେ କେଉଁ ଏରୁଣ୍ଡି ସେପାଖୁ -
ଉଙ୍କି ମାରୁଥିବା ନୀଳ ଆଖି ଅକୁହା ଓଠର ଭାଷା ହଲଚଲ କରେ ଫେରିବାଲାର ଛାତି
ହୃଦୟର ହାଡୁଆ ହିଡରେ
ଅଯଥାରେ ଫୁଟେ ଲକ୍ଷେ ରୋମାଞ୍ଚର ଫୁଲ ।
ରୁତୁମତୀ ମାଟିର ଭିଜା ଗନ୍ଧ କି -
ଓଦା ବେଳାଭୂମିର ତମାମ ଉଡନ୍ତା ପଣତ ତାକୁ କେବେ କରେନାହିଁ ଆନମନା;
ତଥାପି
କେବେ କେଉଁ ରୂପସୀର ପଣତ ଛୁଆଁରେ
ବିଭୋରି ସେ ଯାଏ,
ତା ବେସୁରା ମନ ବେହେଲାରେ -
ଝଂକୃତ ହୁଏ କୋଟି କୋଇଲିର କୁହୁ
ଆଖି ବୁଜି ସହି ଯାଏ
ଜନ୍ମ ଜନ୍ମାନ୍ତର ଯନ୍ତ୍ରଣାର ଲହୁ ।
ଇଚ୍ଛା ହୁଏ -
ଏହିକ୍ଷଣି ଲଙ୍ଘିଯିବ
ଜୀବନର ମିଛ ମୁଲ୍ୟବୋଧ, ଦାରୁଣ - ଦର୍ଶନ,
ସବୁ ଲକ୍ଷ୍ମଣ ରେଖା ସବୁ କଟକଣା
ସଞ୍ଜ ନଇଁ ଗଲେ
ଫେରିବାକୁ ହେବ ଝୁମ୍ପୁଡିକୁ
ଆଉ ଯେତେ ସ୍ଵପ୍ନ ସବୁ ବାଟବଣା ।
ସେଠି ଲଢ଼ି ବାକୁ ହେବ
ଅସରନ୍ତି ବାସ୍ତବ ଯନ୍ତ୍ରଣା ସହିତ !!
ତଥାପି
ଅହରହ ଅନ୍ତଃକନ୍ଦରରୁ ଉତୁରି ପଡ଼ୁଥିବ
ଅସତର୍କ ମୁହୂର୍ତ୍ତରେ ଗଢ଼ିଥିବା ସୁତା ଖିଏର ସମ୍ପର୍କ ;
ଅଣାୟତ କରୁଥିବେ -
ନୀଳ ଆଖି ଅକୁହା ଓଠର ଭାଷା
ଅନିଶ୍ଚିତ ପଣତ ସାନିଧ୍ୟ
ସଂଜ୍ଞାହୀନ ମୃଦୁ ଆତ୍ମୀୟତା,
ସବୁ ଯେପରି ସତ ପରି ଚିହ୍ନା ଚିହ୍ନା
ଜୀବନର ନିଟୋଳ ଭାସ୍କର୍ଯ୍ଯ,
ଅପାଶୋରା ସ୍ମୃତିର କୋଣାର୍କ
ଏଇତ ଫେରିବାଲାର ଜୀବନ ନାଟକ !
