ମାଆ ଓ ମୋବାଇଲ
ମାଆ ଓ ମୋବାଇଲ
ଅବୋଧ ଶିଶୁ ଶୁଆଇବା ପାଇଁ
ଗାଉ ନାହିଁ ମାଆ ଧୋରେ ବାଇଆ ଧୋ
ମୋବାଇଲ ଦେଇ କହୁଛି ଧନରେ
ଦେଖିଦେଖି ତାକୁ ଶୋ ।
ଖୋଇଦେବା ବେଳେ ଡାକୁ ନାହିଁ ମାଆ
ଆ ଜହ୍ନ ମାମୁ ଆ
କହୁଛି ଧନରେ ମୋବାଇଲ ଦେଖି
ଭାତ ଗୁଣ୍ଡା ଗୁଣ୍ଡା ଖାଆ ।
ମୋବାଇଲ ଧରାଇ ମାଆ ତୋଷ କରେ
ଛୁଆ ଯେତେବେଳେ ରୁଷେ
କୋମଳମତି ସେ ମୋବାଇଲ ଦେଖି
ଖିଲିଖିଲି ହୋଇ ହସେ ।
ଏନ୍ତୁଡିଶାଳରୁ ମୋବାଇଲ ଏବେ
ପିଲାମାନଙ୍କ ର ସାଥୀ
ମୋବାଇଲ ଧରାଇ ମାଆ ମାନେ ସବୁ
ଜଞ୍ଜାଳୁ ହୁଅନ୍ତି ମୁକ୍ତି ।