ଲଣ୍ଠନ

ଘରକୁ ଆମର 

 ନୂଆ ଲଣ୍ଠନଟେ 

    ଆସିଥିଲା ଯେଉଁ ଦିନ, 

ଖୁସିର ଲହରୀ 

    ଭରିଯାଇଥିଲା   

     ନାଚି ଉଠୁଥିଲା ମନ l

ଆଗରୁ କେବେ ତ 

  ଦେଖି ବି ନଥିଲୁ 

    ଆମେ ଭାଇ ଓ ଭଉଣୀ, 

ଶୁଣିଥିଲୁ ଯେବେ 

   ମାଆ କହୁଥିଲା 

     ରାଜା ଝିଅର କାହାଣୀ l

ଲଣ୍ଠନ ରେ ଥିବା 

  ଗୋଲିଆ ତାରକୁ 

    ମୋଡିଦେଲେ ଉଠେଜଳି, 

ମନଇଚ୍ଛା ତାକୁ 

  ମୋଡା ମୋଡି କରି 

    ମାଆଠାରୁ ମିଳେ ଗାଳି 

କଳ୍ପନାର ସେଇ

  ଲଣ୍ଠନକୁ ଦେଖି 

    ମନ ଥିଲା ଭାରି ଖୁସି, 

ସଞ୍ଜ ହେଇଗଲେ 

   ବାରଣ୍ଡା ଉପରେ 

     ଜଳୁଥାଏ ସିଏ ବସି l

ଦୁନିଆର ଯେତେ 

   କୀଟ ଓ ପତଙ୍ଗ 

    ଆସୁଥିଲେ ଦୂରୁ ଉଡି, 

ସେମାନଙ୍କୁ ଦେଖି 

   ହୃଦୟରେ ଖୁସି 

     ଅଫୁରନ୍ତ ଆସେ ମାଡି l

ପାଠ ପଢିବାର 

  ମିଛ ବାହାନାରେ 

    ଯାଉ ତା ପାଖରେ ବସି, 

ତା ରୂପ ରଙ୍ଗକୁ 

  ଆଲୋଚନା କରି 

    ଗୃହ କର୍ମ ହୁଏ ବାସି l