ଲାଭ
ଲାଭ
ଦୋକାନରୁ ଯେବେ କିଣୁଥିଲି କିଛି
କେ କଲା ପକେଟ ଫାଙ୍କା ,
ଅଧିକ ଟଙ୍କା ତ ନଥିଲା ପର୍ସରେ
ଥିଲା ମାତ୍ର ଶହେ ଟଙ୍କା ।
ତଥାପି ଥାନାରେ ଦେଲି ମୁଁ ଏତଲା
ଲେଖିଲି ସବୁ ବିସ୍ତୃତ ,
କିନ୍ତୁ ଟଙ୍କା କଥା ବଢ଼ାଇ ଲେଖିଲି
ଶହେ ସ୍ଥାନେ ପାଞ୍ଚ ଶତ ।
ଦୁଇ ଦିନ ପରେ ଚୋର ନିଜେ ଆସି
ପହଞ୍ଚିଲା ଆମ ଘରେ ,
ବିଶ୍ଵାସ ମୋହର ମଜଭୁତ ହେଲା
ଓଡ଼ିଶା ପୋଲିସ ପରେ ।
ଗୋଡ଼ ଧରି ମୋର କହିଲା ଚୋରଟି
ବଞ୍ଚାଇ ଦିଅ ହେ ବାବୁ ,
କହୁଛି ପୋଲିସ ଛାଡ଼ିଦେବି ତୋତେ
ଯେବେ ଅଧା ଟଙ୍କା ଦେବୁ ।
ଭଲଭାବେ ବାବୁ ଜାଣିଛ ପର୍ସରେ
ଥିଲା ତୁମ କେତେ ଟଙ୍କା ,
ଦୁଇଶହ ଟଙ୍କା ଦେଉଛି ତୁମକୁ
କରନାହିଁ ମୁହଁ ବଙ୍କା ।
ଦୁଇଶତ ଟଙ୍କା ଝାମ୍ପିଲି ତା ହାତୁ
ଦେଲି ତାକୁ ଆଶ୍ଵାସନା ,
ନିର୍ଭୟରେ ଯାଆ ଉଠାଇବି କେଶ୍
ଏବେ ମୁଁ ଯାଉଛି ଥାନା ।
ଧ୍ୟାନ ଦେଉନାହିଁ ଏବେ ମୁଁ ପର୍ସକୁ
ହେଲେ ହେଉ ପଛେ ଚୋରି ,
ଏତାଲାଟେ ଦେବି ନିଜେ ଚୋର ଆସି
ଦେବ ଦୁଇଗୁଣ କରି ।