କରୋନାର କାରନାମା

କରୋନା ହେ ତୁମେ ବିଶ୍ୱବକ୍ଷରେ

                କଳଙ୍କର ଏକ ଦାଗ,

ବିଶ୍ୱକୁ ଆଜି ନିଃଶ୍ୱ କରିଛ

                 ନକରି ଟିକିଏ ଖେଦ ।

କରୋନା ହେ ତୁମେ ବିଶ୍ୱପାଇଁ ଏକ

                କେଳେଙ୍କାରୀ ମହାମାରୀ,

ତୁମପାଇଁ କେତେ ଅମୂଲ୍ୟ ଜୀବନ

              ଅକାଳରେ ଗଲା ଝରି ।

କରୋନା ହେ ତୁମେ ବିଶ୍ୱପାଇଁକି

             କରୁଣ ଆର୍ତ୍ତନାଦ,

ତୁମପାଇଁ ଆଜି ଖୁସିନାହଁକାର

                ସବୁରି ବିଷର୍ଣ୍ଣ ଭାବ ।

କରୋନା ହେ ତୁମେ ବିଶ୍ୱପାଇଁ କି

                 ଘୃଣ୍ୟ ଏକ ବିଷମଞ୍ଜି,

ତୁମପାଇଁ କେତେ ତରୁଣୀ ମଥାରୁ

               ସିନ୍ଦୁର ଗଲା ହଜି ।

ଇତିହାସେ ତୁମେ କଳଙ୍କିତ ଏକ

              ଅଧ୍ୟାୟ ଗଲ ଯୋଡି,

କରୋନା ତୁମର କଳା କାରାନାମା

               ପଢ଼ିବେ ଆଗାମୀ ପିଢ଼ୀ ।

କରୋନା ତୁମେତ ବିଜ୍ଞାନପାଇଁ

                ଆହ୍ୱାନ କଲ ସୃଷ୍ଟି,

ବିଜ୍ଞାନର ସବୁ ଚେଷ୍ଟା ସତ୍ତ୍ୱେବି

                ତଥାପି ରହିଛ ତିଷ୍ଠି ।

ଗୋଟିଏ ଦେଶ କି ଦୁଇଟି ବି ନୁହେଁ

                ବିଶ୍ୱକୁ କଲ ଗ୍ରାସ,

ତୁମଲାଗି ଆଜି ହାହାକାର ପଡେ

                 ବିଶ୍ୱ ହେଲାଣି ନିଃଶ୍ୱ ।

କରୋନା ହେ ତୁମେ ଖଟିଖିଆ ମୁଖୁ

             ଛଡାଇ ନେଇଛ ଦାନା,

ତୁମପାଇଁ ଆଜି ବିଦ୍ୟାର୍ଥୀଙ୍କ ପାଇଁ

            ବିଦ୍ୟାଳୟବି ମନା ।

ଗୃହବନ୍ଦୀ କରି ରଖିଛ ସଭିଙ୍କୁ

              ବାହାରକୁ ଯିବା ମନା,

କେତେ ଦିନ ଆଉ ତୁଣ୍ଡିବାନ୍ଧି ମୁଖେ

             କାମକୁ କରିବୁ ନା  ନା ।

ଉଠ ଡାକ୍ତର,ଉଠ ବୈଜ୍ଞାନିକ

                ହେଉ ବିଜ୍ଞାନର ଜୟ,

ବିଶ୍ୱବାସୀଙ୍କ ଖୁସି ଫେରୁ

           ହେଉ ମାନବଜାତିର ଜୟ ।