କଳଙ୍କଟା ଦିଏ କଷ୍ଟ
କଳଙ୍କଟା ଦିଏ କଷ୍ଟ
ଆମ ଏ ଜୀବନେ କେତେ ଯେ ଘଟଣା,
ଦୁର୍ଘଟଣା ଯାଏ ଘଟି ।
କିଛି ଘଟଣା ଯେ ଦେଇଥାଏ ସୁଖ,
କିଛି ଦୁଃଖ ଦିଏ ଭେଟି ।।
କିଛି ଘଟଣା ବି ଦୁର୍ଘଟଣା ରୂପେ,
ଲଗାଏ କଳଙ୍କ ଦାଗ ।
ଆଉ କିଛି ପୁଣି ଘଟଣା ରୂପରେ,
ପହଞ୍ଚାଏ ସୁଖ ଭୋଗ ।।
କଳଙ୍କର ଦାଗ ଥରେ ଲାଗିଗଲେ,
ସେ ଦାଗ ଲିଭେନା ଆଉ ।
ଏମିତିକା ଦାଗ ଆମ ଜୀବନର,
କମାଇ ଦିଅଇ ଭାଉ ।।
ଏହି କଳଙ୍କଠୁ ଦୂରେଇ ରହିଲେ,
ସାର୍ଥକ ହେବ ଜୀବନ ।
ତେଣୁ ଆହେ ବନ୍ଧୁ ଏଇ ଜୀବନକୁ,
କର କଳଙ୍କବିହୀନ ।।
ହାତେ ମାପି ସଦା ଚାଲ ହେ ଚାଖଣ୍ଡେ,
ମନକୁ ନକର ଦୁଷ୍ଟ ।
କଳଙ୍କକୁ ପାଶେ ନ ଦିଅ ଆଶ୍ରୟ,
କଳଙ୍କଟା ଦିଏ କଷ୍ଟ ।।