କିଏ ସରଜିଲା ସୁନ୍ଦର ଧରା

  କିଏ ସରଜିଲା ସୁନ୍ଦର ଧରା 

  ଏମିତି ଯତନ କରି

  ଦିଗ ଚଉଦିଗେ ଭରିଦେଲା ହସ

  ଫୁଲରେ ଫୁଲରେ ମହକ ସୁବାସ

  ଫଗୁଣରେ ରଙ୍ଗ ଭରି

  ଏମିତି ଯତନ କରି ...

  ଝରିଝରି ଯାଏ ବଣ ଝରଣାଟି

  କୁଳୁକୁଳୁ ଗୀତ ଗାଇ

  ନୀଳ ସାଗରରେ ଢେଉ ଅସୁମାରୀ

  ମନ ନିଏ ପରା ମୋହି

  ସବୁଜ ସୁନ୍ଦର ବଣ ପରବତ

  ସବୁଜିମା ଭରା କ୍ଷେତ

  ମଳୟ ମଧୁରେ ଅବୁଝା ଛନ୍ଦରେ

  ପବନ ଗାଉଛି ଗୀତ

  କହରେ କିଏସେ ଆଖିରେ ଆଖିଏ

  ସପନ ଦେଇଛି ଭରି

  ଏମିତି ଯତନ କରି ...

  ଶିଶୁର ଓଠରେ ଖିଲିଖିଲି ହସ

  କୋଇଲିର ମିଠା ଗୀତ

  ବଉଦ ବଖାଣେ ବରଷାର ଗୀତ

  ନାଇ ମେଘ ରଙ୍ଗୀ ପାଟ

  ମାଟିକୁ ଚୁମଇ ଶୀତଳ ଯୋଛନା

  ଆକାଶର ବୁକୁ ଚିରି

  କହରେ କିଏସେ ଯାହାକୁ ଦୁନିଆ

  ନିଇତି ହେଉଛି ଝୁରି

  ଅଦେଖା ପୁରୁଷ ଦେଖା ଦିଅ ଥରେ

  ସବୁ ଦୁଃଖ ନିଅ ହରି

 ସବୁ ଓଠେ ହସ ଭରି...