ଖଣ୍ଡିଆ ଭୂତ

ହାଏ ସୁପ୍ରିମ କୁକୁଡ଼ା ଫାରମ

   ହୋଇଅଛି ପୋଷାପାଳା

ଅଣ୍ଟିରୁ ପଇସା କାଢିଲେ ମଉସା

  ମାଉଁସ ହୋଇବ ଗିଳା ।

ଚୂଳରେ ଝୁଲୁଛି  ନାଲିଆ ମୁକୁଟ

  ଗଳାରେ ବନ୍ଧା ଓଳଣ

ହାତରେ କଟୁରୀ ଧରିଛି ବାଇନ

  ବିକୁଛି କିଲୋ ଓଜନ ।

 ରାତି ଅଧକରେ  କର ଭୋଜିଭାତ

  ମଉଜ ବା ଖିଆପିଆ

ବାଇନ ଫାରମ ଖୋଲେ ଅବେଳରେ

  ଉଚ୍ଚା ଦାମ୍ ଦିଆନିଆ ।

ପଇସାର ଖେଳ ଚାଲିଛି ସବୁଠି

  ଆଇନ୍ ଯାଏ ବାଟେ ବାଟେ

ଭାସେ ସପନରେ ଗରିବ ଗୁରୁବା

  ଓଦାକନା ଦେଇ ପେଟେ ।

ବଳି ପଡ଼େ ହୋଇ ଛେଳିମେଣ୍ଢା ଗାଈ

  ଫାରମ କୁକୁଡ଼ା ପ୍ରାୟ

ଖଣ୍ଡିଆ ବିକାଶ ଭୂତ ଚକ୍ରବାତ

  ତା ଦୁଃଖେ କିଏ ବା ଦାୟ ?

ମୁଣ୍ଡ ଝାଳ ତୁଣ୍ଡେ ମାରେ ଶ୍ରମଜୀବୀ

  ଶୂନ୍ୟାକାଶେ ଚାଷୀ ଚାହେଁ

ରକ୍ତ ପାଣି ଫାଟି ନିଗିଡିଲେ ଯେତେ

  ନ ପୂରେ ପେଟ ଚାଖଣ୍ଡେ ।

ବିଦ୍ୟା ପେଞ୍ଚପାଞ୍ଚ ଅତି ପରପଞ୍ଚ

  ମାରାତ୍ମକ ପୁଞ୍ଜି ନିଶା

ପରର ରକତ ଶୋଷଣେ ବଢ଼ଇ

  ଘୋଡ଼ା ଗାଡ଼ି କୋଠା ପେଷା ।

ବାଇନଙ୍କ ଭାଉ କହିଲେ ନସରେ

  ମୁଣ୍ଡ ରେ ସୁନା କଳସ

ରାଜନୀତି ଉଚ୍ଚ ପଦପଦବୀ ଶ୍ରୀ

  ବାବନ ଚନ୍ଦ୍ର ଭବିଷ୍ୟ ।

ନିରୀହ ଜନତା ରକତ ନ ଝରୁ

  ଏ ଜଗତେ ଅକାରଣେ

ପ୍ରଭୁ ଚକ୍ରଧର ହୁଅନ୍ତୁ ସହାୟ

  ରଖନ୍ତୁ ଛତ୍ର ଉହାଡେ ।