କେନ୍ଦ୍ର ବିନ୍ଦୁ (ମୋ ମାଆ)
କେନ୍ଦ୍ର ବିନ୍ଦୁ (ମୋ ମାଆ)
ସୌର ମଣ୍ଡଳର କେନ୍ଦ୍ରବିନ୍ଦୁ ତୁହି
ଆମେ ସବୁ ଗ୍ରହପୁଞ୍ଜ
ତୋହରି ଆଲୋକେ ଆଲୋକିତ ଆମେ
ତୁ ଆମ ସକାଳ ସଞ୍ଜ ।
ତୋ ପଣତ କାନି ସୁରକ୍ଷା କବଚ
ଅଟେ ସନ୍ତାନଙ୍କ ପାଇଁ ।
ବଚନ ତୋହର ପ୍ରାଣ ସଞ୍ଜିବନୀ
ଜୀବନ ସଞ୍ଚାର ପାଇଁ ।
ଆକାଶର ସମ ବିଶାଳ ହୃଦେ ତୋ
ଆମେ ସବୁ ତାରା ଫୁଲ
ଅମା ଅନ୍ଧକାରେ ପୂନେଇଁ ଜହ୍ନ ତୁ
କିଏ ହେବ ତୋର ତୁଲ ।
ତୋ ସଂସ୍କାରେ ଗଢା ଆମରି ଜୀବନ
ଅଟୁ ତୁ ଆନନ୍ଦମୟୀ
ଗୀତା ଭାଗବତ ଅଟେ ନିରର୍ଥକ
ତୋ ଆଦର୍ଶେ ଥିଲେ ରହି ।
ସୁଖର ଅମୃତ ବାଣ୍ଟୁ ଥାଉ ତୁହି
କୋହ ଚାପି ହୃଦୟରେ
ଆମରି ସୁଖରେ ସ୍ୱର୍ଗ ସୁଖ ଲଭୁ
ଲୋତକ ଢାଳୁ ଦୁଃଖରେ ।
ମମତାର ଅଟୁ ଅଥଳ ସାଗର
ପୁଷ୍ପ ଠୁଁ କୋମଳ ମନ
ତୋ ଆତ୍ମା ବନ୍ଧନେ ବନ୍ଧା ସବୁ ଆମେ
ପରଶେ ମହକେ ପ୍ରାଣ ।
ସରଗ ସମାନ ହୋଇଥାଏ ଘର
ତୋର ସ୍ନେହ ଶ୍ରଦ୍ଧା ପାଇଁ
ଗୃହ ମନ୍ଦିରର ଚିର ବନ୍ଦନୀୟା
ଦେବୀ ତୋ ତୁଳନା ନାହିଁ ।