କେମିତି କହିବି ପ୍ରଭୁ
କେମିତି କହିବି ପ୍ରଭୁ
ପାଇ ଗଲା ପରେ ସବୁ
ତୁମ ନାମେ ମୁହଁ ଖୋଲି,
କେମିତି କହିବି ପ୍ରଭୁ
କିଛି ଦେଇ ନାହଁ ବୋଲି ?୦।
ଦେଇଛ ତ ପଞ୍ଚଭୂତ
ଆତ୍ମା ସାଥେ ଏ ଶରୀର,
ବୁଦ୍ଧି ବିବେକ ସହିତ
ମୁଖରେ ଭାଷା ମଧୁର।୧।
କରି ମନେ ଅଭିମାନ
କାମନାରେ ହୁଏଁ ବାଇ,
ଏ ଜୀବନ ତୁମ ଦାନ
ଖୁସି ହେଉ ନାହିଁ ପାଇ।୨।
ପାଇ ଗଲା ପରେ ସବୁ......
କରମ କରୁଛି ଯାହା
ପାଉଛି ମୁଁ ତାର ମୂଲ,
କେବେ ଭାବେ ନାହିଁ ତାହା
କରୁଛି ମନ୍ଦ କି ଭଲ।୩।
ମାତି ମୁଁ ଭୋଗ ବିଳାସେ
ମିଛରେ ହେଉଛି ଧନ୍ଦି,
ସତ୍ୟ ପଥ ହୁଡ଼ି ବସେ
ମାୟାରେ ହେଉଛି ଛନ୍ଦି।୪।
ପାଇ ଗଲା ପରେ ସବୁ......
ଅଜ୍ଞାନ ଅନ୍ଧାରୁ ନିଅ
ଦେଖାଇ ଆଲୋକ ପଥ,
ଭରସା ବିଶ୍ଵାସ ଦିଅ
ପୂର୍ଣ୍ଣ ହେଉ ମନୋରଥ।୫।
ତୁମେ କୃପା କରି ରଖ
ତୁମ ବାହୁ ଛାୟା ତଳେ,
ଦୂରେ ଯାଉ ମୋର ଦୁଃଖ
ପ୍ରାର୍ଥନା କରେ ବିକଳେ।୬।
ପାଇ ଗଲା ପରେ ସବୁ......