କବିତା ପର୍ବ : (ଅତିରିକ୍ତ) ବ୍ୟଙ୍ଗକବିତା-76: ମନ୍ଦିର ତୋଳା
କବିତା ପର୍ବ : (ଅତିରିକ୍ତ) ବ୍ୟଙ୍ଗକବିତା-76: ମନ୍ଦିର ତୋଳା
ସର୍ବଭୂତେ ବିଷ୍ଣୁ ବିରାଜିତ ବୋଲି ରହିଛି ଆସ୍ଥା ଆମର,
ସେହି ବିଶ୍ଵାସକୁ ଲୁଟନ୍ତି କେତେକ ଠକ-ପାଜୀ-ତାଉଟର |
ବାଟରେ ଘାଟରେ ନାଳ ନର୍ଦ୍ଦମାରେ ପୋଲ ଖୋଲଜାଗା ଦେଖି,
ବସାନ୍ତି ପଥର ଦେଇ ଫୁଲମାଳ ନାଲିଆ ସିନ୍ଦୂର ମାଖି |
ଚେଲା ମାଧ୍ୟମରେ ପ୍ରଚାର କରନ୍ତି ଭାରି ପ୍ରତ୍ୟକ୍ଷ ଏ' ଦିଅଁ,
ଦାନବାକ୍ସ ବସେ ହୋଇବ ମନ୍ଦିର ମୁକ୍ତହସ୍ତେ ଦାନଦିଅ |
ଦାନ ମିଳୁଥିଲେ କୁଡ଼ିଆରୁ ଟିଣ-ଟାଇଲି ଛପର ହୁଏ,
ପୂଜାରୀ ଭିକାରି ଗଂଜଡ଼ ମଦୁଆ ବାବାଜୀ ବି ଆଶ୍ରା ପାଏ |
ଚାନ୍ଦା-ଭେଦା ପୁଣି ମାନସିକ ବଳେ ଫିଟେ ଧନ ଗୁପ୍ତଦ୍ୱାର,
ଦୟା ବି ଦେଖାନ୍ତି ଲାଞ୍ଚଖିଆ ବାବୁ ନେତା ଗଢନ୍ତି ମନ୍ଦିର |
ଆମ ଏ' ଦେଶରେ ମନ୍ଦିର ଅଭାବ ଉବୁଟୁବୁ ଭକ୍ତିଭାବ,
ନ୍ୟାୟ କି ଅନ୍ୟାୟ ଧନ୍ୟ କିବା ଧିକ ବିଚାର କରି କହିବ |