କାଲୁଆ ଭାଲୁଆ ଗାଲୁଆ

   

   

   ବରଷା ମାସରେ ପାଣି ଜମି ରହେ

   ବାଟଘାଟ ଯହିଁ ଖାଲୁଆ

   ପାଣିର ଧରମ ଗଡିଯିବାପାଇଁ

   ଭୂଇଁ ଯେଉଁଆଡେ ଢାଲୁଆ ll

   ଶୀତୁଆ ସକାଳ ଶୀତୁଆ ପବନ

   ଦେହକୁ ଲାଗଇ କାଲୁଆ

   ଶୀତ ଆସିଲେତ ବଗିଚାରେ ଫୁଟେ

   ରଙ୍ଗବେରଙ୍ଗର ଡାଲିଆ ll

   ଦୀଘି ପୋଖରୀରୁ ମାଛ ଧରିବାକୁ

   ଆସନ୍ତି ଦୂରରୁ ଜାଲୁଆ

   ରାତିରେ ଘରକୁ ଜଗିରହେ ଆମ

   ପୋଷା କୁକୁରଟି ଭାଲୁଆ ll

   ଜାଣିଜାଣି ଯିଏ ଭୁଲ କରେ ତାକୁ

   କୁହନ୍ତି ସମସ୍ତେ ଗାଲୁଆ

   ଅଳସୁଆ ମାନେ କାମ ନାଁ ଶୁଣି

   ହୋଇଯାଆନ୍ତି ତ ହାଲିଆ ll

   ଗାଈଗୋରୁ ମାନେ ପାଣି ପିଇବାକୁ

   ଗୁହାଳରେ ଅଛି ଛେଲୁଆ

   କୋଡି କୋଦାଳକୁ କାନ୍ଧରେ ପକାଇ

   କ୍ଷେତକୁ ଯାଆନ୍ତି ମୂଲିଆ ll

   ଭାରି ସୁଆଦିଆ ବୋଉ ହାତ ରନ୍ଧା

   ପିଠା ମିଠା ସୁଜି ହାଲୁଆ

   ଖାଇବୁ ଯଦି ତୁ ଝଅଟ ଝଅଟ

   ହାତ ମୁହଁ ଧୋଇ ଚାଲିଆ ।