ଲାଇବ୍ରେରୀ
ପ୍ରୋଫାଇଲ୍
କାଗଜ ଡଙ୍ଗା
କାଗଜ ଡଙ୍ଗା
କାଗଜଡଙ୍ଗାରେ ଯେଦିନୁ ଛାଡିଲି ପ୍ରେମ ତୋର,
ସେଦିନୁ ଦେଖୁଛି ଭାରି ସ୍ବାର୍ଥପର ଦୁନିଆ ମୋର,
ବିଭୁ ରସନାର ବାସନା ବିହୀନ ଏଇ ମଣିଷ
ସ୍ବାର୍ଥ ସାଧନାରେ ପିଇପାରେ ନର ଉତ୍କଟ ବିଷ ।
ସମୟ ସୁଅରେ ବଡହେଲି ସିନା ପରେ ବୁଝିଲି
ଦୟାମାୟା ନାହିଁ ରକତେ ଏଇଠି ବାଟ ହୁଡିଲି
ସ୍ବାର୍ଥ ପାଇଁ ଏଠି ଆପଣା ମଣିଷ ଛଡାନ୍ତି ହସ
ସ୍ବାର୍ଥ ସାଧନାରେ ପିଇପାରେ ନର ଉତ୍କଟ ବିଷ ।
ଧମନୀର ରକ୍ତ ବୁଝିତ ପାରେନା ରକ୍ତ ସମ୍ପର୍କର ମାୟା
ଧିରେ ଧିରେ ସେହି ମାୟାଧାରୀ ଗଣ ଦେଖାନ୍ତି ପୂର୍ଣ୍ଣକାୟା
ବିଶ୍ୱାସ ରାସ୍ତାରୁ ବହୁଦୂରେ ଥାଇ ଫୁଟାନ୍ତି ହସ
ସ୍ବାର୍ଥ ସାଧନାରେ ପିଇପାରେ ନର ଉତ୍କଟ ବିଷ ।
ଅଭିସନ୍ଧି ରକ୍ତ କରିପାରେ ତା'ର ରକ୍ତକୁ ପର
ପରଜୀବୀ କେବେ କହିକି ପାରିଛି କା'ରେ ନିଜର
ହିଂସ୍ର ପରାଏ ଝୁଣି ସେ ଶୋଷଇ ରକତ ମାଂସ
ସ୍ବାର୍ଥ ସାଧନାରେ ପିଇପାରେ ନର ଉତ୍କଟ ବିଷ ।
ମିଛ ସମ୍ପର୍କ ରାଗ ଅନୁରାଗ ଲାଗେ ମହଙ୍ଗା
ସ୍ବାର୍ଥ ସାଧନେ ଆପଣା ବି ପର କାଗଜଡଙ୍ଗା
ଆତ୍ମବଡିମା ଦାୟଦ ର ମୂଲ୍ୟ ଲାଗେ ହସ
ସ୍ବାର୍ଥ ସାଧନେ ପିଇପାରେ ନର ଉତ୍କଟ ବିଷ ।
ବାହାନା ଭିତରେ ସମ୍ପର୍କ ଗଢେ ଏଇ ମଣିଷ
ପଛରେ ହାରାମୀ ଆଗରେ ହେ ରାମ ଉଚ୍ଛ୍ବାସ
ବାପମାଆ ତାଙ୍କ ହ୍ବନ୍ତି ତିରସ୍କାର ଅଲୋଡ଼ା ମଣିଷ
ସ୍ବାର୍ଥ ସାଧନେ ପିଇପାରେ ନର ଉତ୍କଟ ବିଷ ।
ସବୁଦିନ ନୁହଁ ଚାନ୍ଦିନୀ ରାତି ତୁମ ପାଇଁ
ସମୟ ଜବାବ ଅବଶ୍ୟ ମାଗିବ ଯିବ ନଇଁ
ଅସହାୟ ତୁମେ ଦୟାର ପାତ୍ର ଅମଣିଷ
ସ୍ବାର୍ଥ ସାଧନେ ପିଇପାରେ ନର ଉତ୍କଟ ବିଷ ।
କାଗଜଡଙ୍ଗାରେ ପ୍ରେମ ତୋର ଥିଲା ଚିର ଶାଶ୍ବତ
ବିଭୁ ପ୍ରେମ ପ୍ରତି ଏ ଜୀବନ ମୋର ସମର୍ପିତ
ଦୂରୁ ଜୁହାର ହେ କଳୁଷିତ ପ୍ରାଣ ଅମଣିଷ
ସ୍ବାର୍ଥ ସାଧନେ ପିଇପାରେ ନର ଉତ୍କଟ ବିଷ ।
