କାଦମ୍ବିନୀ କଦମ୍ବ

  

ମହୀରେ ବିଜେ ବରଷା କାଳ

  ଆକାଶେ ମେଘ ମାଳ l

ଧରଣୀ ମୁଖେ ଅମ୍ବୁଦେ ସୁଖେ 

  ବରଷି ଯାନ୍ତି ଜଳ ll

ଅଶନୀ ସ୍ୱନ କମ୍ପାଇ ଘନ

  ବଜରେ କମ୍ପେ ମହୀ l

ଏକାଳେ ଗିରି କାନନ ଶୋଭା

   ଉପମା ଅଛି କାହିଁ ll

କଦମ୍ବ ବନ୍ଧୁ ନିନାଦ ଶୁଣି 

  କଦମ୍ବ କାଦମ୍ବିନୀ l

ମଣ୍ଡିଲେ ମହୀ ଚଞ୍ଚଳ ହୋଇ

  ବନବିଟପୀ ଶ୍ରେଣୀ ll

ରୂପ ତାହାର କି ମନୋହର

   ହିଙ୍ଗୁଳେ ସ୍ୱଚ୍ଚ ତନୁ l

ଦେଖିଲେ ଥରେ ନାହିଁ ପଶୋରେ 

  ଦେଖଣାହାରୀ ମନୁ ll

ଧନ୍ୟରେ ଫୁଲ ଅମୂଲ ମୂଲ 

   ଦି ଦିନ ପାଇଁ ଫୁଟୁ l

ତୁଟାଇ ଦମ୍ଭ ଆରେ କଦମ୍ବ 

  ଧରଣୀପରେ ଲୋଟୁ ll

କ୍ଷଣ ଭଙ୍ଗୁର ଭବ ସଂସାର 

  ଦି ଦିନ ଶୋଭା ଜାଣି l

କଦମ୍ବ ବନୁ କଦମ୍ବ ତୋଳେ

  ଚତୁରୀ ରାଧାରାଣୀ l

କଦମ୍ବ ବନୁ ମୂରଲୀ ସ୍ୱନ

  ମଧୁରେ ଶୁଭିଲାଣି l

ନିପ ମୁଳିଆ ବାଙ୍କ ଚୁଳିଆ

  ଉଭା ମୂରଲୀପାଣି ll

ଯମୁନା ପାଣି ବହେ ଉଜାଣି 

  ଧାରା ଶ୍ରାବଣ ବାରି l

ଛନ୍ଦା ଚରଣ ଗୋପୀ ରମଣ 

   ପ୍ରାବୃଟ ରାସେ ହରି ll