ଜୟ ମାଆ ମହାଲକ୍ଷ୍ମୀ

ଜୟ ମହାଲକ୍ଷ୍ମୀ ସିନ୍ଧୁ ରାଜଜେମା 

          ବିଷ୍ଣୁଙ୍କ ହୃଦୟ ହାର l

କି ବର୍ଣିବି ମାତା ମହିମା ତୋହର 

         ଅଟେ ଅନନ୍ତ ଅପାର ll

ରତନ ଭୂଷଣୀ ସୁବର୍ଣ୍ଣ ବରଣୀ 

         ପିତା ଯା ରତ୍ନ ଆଗାର l

ମହୋଦଧି ନୀରେ କ୍ଷୀରାବ୍ଧୀ ଶୟନ 

         ସିନ୍ଧୁ ସେ ମହାସାଗର ll

ସଂସାରର ଶିରି ଅଟୁ ମାଆ ଲକ୍ଷ୍ମୀ 

         ବାସ ତୋ ଶିରି ମନ୍ଦିର l

ଶ୍ରୀକ୍ଷେତ୍ର ମଣ୍ଡନି ଶ୍ରୀରୂପରେ ମାତ 

        ବିଖ୍ୟାତ ନାମ ତୋହର ll

ପଦ୍ମାଳୟା ପଦ୍ମା ପଦ୍ମିନୀ ପଦ୍ମଜା 

          କମଳିନୀ ପଦ୍ମାସନୀ l

ପଦ୍ମଗନ୍ଧା ରମା ବିଷ୍ଣୁ ମନୋରମା

         ଜୀବ ପାଳିକା ଜନନୀ ll

ଶ୍ରୀକ୍ଷେତ୍ରେ ପାଚିକା ତ୍ରିପୁରେ ଅର୍ଚ୍ଚିତା 

         ରନ୍ଧା ତୋ ମହାପ୍ରସାଦ l

ପ୍ରାପ୍ତମାତ୍ରେ ଭକ୍ଷ୍ୟ ଅମୃତ ପ୍ରତ୍ୟକ୍ଷ 

         ପଳାଇ ଘୋର ବିଷାଦ ll

ଅଷ୍ଟଲକ୍ଷ୍ମୀ ରୂପେ ଐଶ୍ୱର୍ଯ୍ୟ ଦାୟିନୀ 

        ଲୋଡ଼ା କି ଆଉ ଐଶ୍ୱର୍ଯ୍ୟ l

ରତ୍ନାକର ଜେମା ପୁଜନ ଗାରିମା 

          ସିଦ୍ଧି ହୁଅଇ ନିଧାର୍ଯ୍ୟ ll

ସୁର ନର ବନ୍ଦ୍ୟା ବନ୍ଦଇ ଅବିଦ୍ୟା 

        ମାଆ ଲୋ ପଦ୍ମଲୋଚନୀ l

ଅଭୟ ଚରଣେ ଶରଣ ବାଞ୍ଛିଲି 

          ପାମର ମୁଢ଼ ଅଜ୍ଞାନୀ ll