ଜୀବନ ଖରା ଛାଇ ଖେଳ
ଜୀବନ ଖରା ଛାଇ ଖେଳ
ସଂସାରେ କାହାର ସମତଳ ନୁହେଁ
ଜୀବନର ଚଲାପଥ
କେବେ ଆସେ ସୁଖ କେବେ ପୁଣି ଦୁଃଖ
ଘୁରୁଥାଏ ହୋଇ ବୃତ୍ତ |
ଦୁଃଖ ତ ନଥିଲେ କେବେ ବି ଜୀବନେ
ସୁଖ ନୁହେଁ ଅନୁଭବ
ନିଜ କର୍ମମତେ ଆସେ ଜୀବନରେ
ଫଳ ତାର ଅନୁରୂପ |
କର୍ମ ସିଦ୍ଧାନ୍ତର ନିୟମ ତ ଏହା
ପ୍ରତି କାର୍ଯ୍ୟ ପରିଣାମ
ସମୟର ସ୍ରୋତେ ଭୋଗ ହୁଏ ତାହା
ଆସିଥାଏ ହୋଇ ସୂକ୍ଷ୍ମ |
କେବେ ମିଳିଯାଏ କର୍ମ ଫଳ ଶୀଘ୍ର
ସମୟର ଅନୁକୂଳେ
କେବେ ରହିଯାଏ ପ୍ରାରବ୍ଧ ହୋଇ ସେ
ଅଦୃଶ୍ୟ ଆତ୍ମାର କୋଳେ |
ଭଲ କର୍ମ ଦିଏ ଜୀବନର ପଥେ
ଫୁଲର ଗାଲିଚା ପାରି
ପାପ ଦେଇଥାଏ ଅସରା ଲୁହ ଯେ
ଜୀବନେ ଯନ୍ତ୍ରଣା ଭରି |
ନିଜ କର୍ମ ମତେ ଜନ୍ମ ହୁଏ କିଏ
ସୁନାର ଚାମଚ ଧରି
କିଏ ଆସିଥାଏ ଲଭିବାକୁ ଦୁଃଖ
ଜୀବନଟା ଯାଏ ଝରି |
ସଂସାରେ ଲାଗିଛି ଦୁଃଖ ପରେ ସୁଖ
ସତେ ଖରା ଛାଇ ଖେଳ
ଜୀବନ ଏମିତି ସବୁ ଭୋଗୁଥାଏ
ଆସେ ଯେବେ ଯେଉଁ ବେଳ |