ଜହ୍ନ ଯେବେ ଉଇଁଆସେ
ଜହ୍ନ ଯେବେ ଉଇଁଆସେ
ଯେବେ ଜହ୍ନ ଉଇଁଆସେ
ଅଗଣାରେ ମୋର
ତୁମ କଥା ମନେପଡେ
କାହିଁ ବାରମ୍ବାର ,
ସୁନେଲି କିରଣେ ହସେ
ଏଇ ବସୁନ୍ଧରା
ଖେଳୁଥାନ୍ତି ଆକାଶରେ
ଟିକିଟିକି ତାରା ,
ଜହ୍ନ ଦେହେ ତୁମ ମୁହଁ
ଦିଶେ କି ସୁନ୍ଦର....
ଯେବେ ଜହ୍ନ ଉଇଁଆସେ
ଅଗଣାରେ ମୋର....।
ନୀରବତା ଭାଙ୍ଗି ଶୁଭେ
ଅଶରୀର ସ୍ଵନ
ଆଖିଆଗେ ଭାସିଯାଏ
ଅଦେଖା ସପନ ,
ରାତ୍ରିର ବୟସ ବଢ଼େ
ନିଦୁଆ ଆଖିରେ
ତୁମେ ପୁଣି ଦେଖାଦିଅ
ମନ ଆଇନାରେ ,
ଅପେକ୍ଷାରେ ରହିଥାଏ
ନୂଆ ସକାଳର....
ଯେବେ ଜହ୍ନ ଉଇଁଆସେ
ଅଗଣାରେ ମୋର....।