ଝଡ଼ି ପଡ଼ିଲେ ଝରଣା

ମନ ଝରଣା ସେ ବନ ଝରଣା l

   ସୁର ତାଳ ଲୟେ କେଳିପ୍ରବୀଣା ll

ଅଦିନ ମେଘର ଅଦିନ ଝଡ଼ି l

    ପାହାଡ଼ୁ ବାହାରି ଚାଲଇ ମାଡ଼ି ll

ମଲା ଜହ୍ନେ ଖୋଜି ଶଶ କଳଙ୍କ l

     ନବଜନ୍ମ ଲଭି ଛାଡ଼ିଲା ଛାପ ll

ଅଙ୍କା ବଙ୍କା ଗଡ଼ି ଅମଡ଼ା ବାଟେ l

   ପଥରେ ଆକାଶବାଣୀକୁ ଭେଟେ ll

ଦୂରଦର୍ଶୀ ବାର୍ତ୍ତା ଦୂରଦର୍ଶନେ l

   ଝରଣାକୁ ଛାଡ଼ି କେ ହେବ ଜଣେ ll

ସମୟ ତ ବଳବାନରେ ଭାଇ l

   ଛେଳିଜଗେ ବଣରେ ତଅପୋଇ ll

ଘରମଣି ଘରମଣି ଡାକରେ l

    ଝୁମୁ ଅପା ବୁଲେ ବନ ଭିତରେ ll

ହିସାବ ନିକାସ ତୁଟାଇ ଦେଇ l

    ଝରଣା ମିଶିଛି ନଦୀରେ ଯାଇ ll

ଆକାଶ ବାଣୀର ଉପସ୍ଥାପିକା l

   କେତେ ଛାପ ଛାଡ଼ି ଛପି ଛପିକା ll

ଲାଲପାନ ବିବି ଲତା ଲାବଣ୍ୟ l

    ଛଟା ଘଟା ଛନ୍ଦ କାନ୍ଦ କାରୁଣ୍ୟ ll

ଝୁରେ ଝରଣାକୁ ଦୂର ଦର୍ଶନ l

     ଓଡ଼ିଆ ସିନେମା ଅଲିଭା ଚିହ୍ନ ll

ଝୁରୁଛି ଉତ୍କଳ କଳା ଜଗତ l

    ସିନେମା ନାଟକ କଳାସାହିତ୍ୟ ll

ନାହିଁ ପଟାନ୍ତର ସହିତେ ତୋର l

    କୋଟି ହୃଦେ ହୋଇଗଲୁ ଅମର ll

ଝର ଝର ଝରି ଭଉଣୀ ରାଣୀ l

   ଝରଣା ଶୁଭୁନି ଆଉ ତୋ ବାଣୀ ll

ଦିବ୍ୟ ଧାମେ ଭଗ୍ନୀ କର ତୁ ବାସ l

    ଏତିକି ମାତର ମୋର ସନ୍ଦେଶ ll

ଶ୍ରୀଜଗନ୍ନାଥ ହେ କରୁଣାର୍ଣ୍ଣବ l

     ହେ ବିଶ୍ୱବିଧାତା ବିଶ୍ୱବାନ୍ଧବ ll

ମିନତି ଜଣାଏ ଭଗ୍ନୀକୁ ମୋର l

   ପଦେ ଆଶ୍ରା ଦେବୁ କମଳାବର ll