ହରି ହର ଭେଟ
ହରି ହର ଭେଟ
ଘେନି ଥାଟ ପଟ ହରି ହର ଭେଟ
ହୁଅନ୍ତି ପଶ୍ଚିମା ଶମ୍ଭୁ
ଥାନା ପତି ସେତ ନାମ ସୋମନାଥ ଶହେ ଆଠ ଦୋଳେ ପ୍ରଭୁ ।
ବିଜେ ହରି ହର ହରିରାଜ ପୁର
ନାମର ତାପ୍ତର୍ଯ୍ୟ ଏହି
ଖୋର୍ଦ୍ଧା ଗଡ ବକ୍ଷେ ଇତିହାସ ଲେଖେ
ଆମ ସଂସ୍କୃତିକୁ ନେଇ ।
ଫଗୁଣେ ଫଗୁର ପସରା ଆସର
ପଞ୍ଚୁ ଦୋଳରେ ମିଳନ
ଆସୁଥାନ୍ତି ଦୋଳେ ମହା ଆଡ଼ମ୍ବରେ
ଫୁଟେ କେତେ ରଙ୍ଗେ ବାଣ ।
ଆକାଶଟା ସାରା ସଜ୍ଜା ହୁଏ ପରା
କୃତ୍ରିମ ନକ୍ଷତ୍ର ତାରା
ଗଛ ବାଣ ସାଥେ ବଡ କାଠ ଚକ୍ରି
ଦିଶେ ଚତୁର୍ଦ୍ଦିଗେ ତୋରା ।
ନାଚୁ ଥାଏ ଘୋଡ଼ା ନାଚେ ବୁଢୀ ବୁଢ଼ା
ବୃଷଭ ମୁଣ୍ଡ ହଲେଇ
ଘଣ୍ଟ ତାଳେ ତାଳେ ରଙ୍ଗ ଅବିରରେ
ଦୁଲୁକି ପଡ଼ଇ ମହି ।
ହଜାର ହଜାର ଜନତାଙ୍କ ଭିଡ଼
କାହିଁ ଗଳି କନ୍ଦି କେତେ
ରହିଥାଏ ପୁରି ଏଠି ପୁରୀ ଭଳି
ଦୁନିଆଁର ଚିଜ ଯେତେ ।
ଷୋଳଶହ ସଇଁ ତିରିଶ ମସିହା
ଆରମ୍ଭ ହୁଏ ମେଳଣ
ଗୋବର୍ଦ୍ଧନ ଦାସ ନିତେଇ ସାହୁ ଯେ
ମୁଠି ଚାଉଳ ମାଗିଣ ।
ଅଶି ମୌଜା ଲୋକ ଆସି ଏକତ୍ରିତ
ଅଶି ଏକର ପଡିଆ
ମୁଠି ଚାଉଳର ମେଳଣ ଆସର
ହେଲେଣି କୋଟି ପଣିଆଁ ।
ଅବିରର ଗଦା ଲାଗେ ରଙ୍ଗ ଛିଟା
ଭିନ୍ନ ମଣିଷଟି ପରି
ହଜି ଯାଏ ମନ ଏଠି ପାଞ୍ଚ ଦିନ
ସବୁ ଦୁଃଖ କଷ୍ଟ ଭୁଲି ।
ଭାଇଚାରା ସୃଷ୍ଟି ବଞ୍ଚାଏ ସଂସ୍କୃତି
ଧର୍ମୀୟ ଭାବନା ନେଇ
ନୂଆ ଉନ୍ମାଦନା ଭରି ଦିଏ ସିନା
ଅବିରକୁ ବୋଳି ହୋଇ ।