ଗୁଳୁଗୁଳି ପର୍ବ
ଗୁଳୁଗୁଳି ପର୍ବ
କାହିଁକି କେଜାଣି
ମ୍ଳାନ ଶରତ ସନ୍ଧ୍ୟାରେ
ହୁଗୁଳା ପବନ ଉଭାନ୍
ଗୁଳୁଗୁଳିର ନିର୍ମମ ଉଚ୍ଚାରଣ
ଝାଳରେ ଆପ୍କୁତ କପୋଳ ଲଲାଟ
ଆସୂର୍ଯ୍ୟମପଶ୍ୟ ସ୍ଥାନରେ ବିଭ୍ରାଟ ।
କାହିଁକି କେଜାଣି
ମୁକୁଳି ପାରୁନି ନିଜକୁ
ଶାରଦୀୟ ଶିଶିର
ଶୀତଳତାର ଶିକୁଳି
ହେଉଛି ତଲ୍ଲୀନ ମୋହାଛନ୍ନ
ସମ୍ମୋହନ ବାଉଳି
ବାଦଲଫଟା ଘନଘଟା ହେଣ୍ଟାଳ
ଲଘୁଚାପ ବର୍ଷାର ରୂପ କରାଳ
ମୌସୁମୀ ଫେରୁଛି ଶରତ ପିଠିରେ
ସ୍ଵପ୍ନଭଙ୍ଗ ଶାରଦୀୟ ପାର୍ବଣ ଋତୁରେ ।
କାହିଁକି କେଜାଣି
ଅନ୍ତଃସ୍ଵରେ ସୁଦୀର୍ଘ ନୀରବତା
ଋତୁଚକ୍ରେ ବିକ୍ଷିପ୍ତ ବିଭିନ୍ନତା
ସମ୍ଭାବନାର ସ୍ୱପ୍ନ ଡଙ୍କଉ ନାହାନ୍ତି ଆଜିକାଲି
ଲାଉ- ପୋଇ- କଖାରୁ ଲତା ପରି ମନ- ମଥାନରେ ହଲି ଦୋହଲି
ସ୍ମୃତି ସିଲଟରେ ସମୟର ଦଂଶନ
ଛାତି-ମତି ମନ୍ଥି ହୁଏ ଚିନ୍ତା ଚେତନ ।
କାହିଁକି କେଜାଣି
କୁଆଁରୀ ଶୀତର ନରମ ଆସ୍ତରଣ
ରଜନୀ ରାଣୀର ଶିଶିର ଶୀହରଣ
କୋମଳ ସକାଳର ପତଳା ବେହରଣ
କୀଟଦ୍ରଂଷ୍ଟ ମର୍ମଲିପି ମୋର
ଆହତ ସନ୍ତାପିତ ଶର୍ମଶାର ।
କାହିଁକି କେଜାଣି
ବ୍ୟତିକ୍ରମ ଆଜିର ଏ ଜଳବାୟୁ
ପ୍ରକୃତି କ୍ଷଣ କ୍ଷଣକେ ଆନ
ଉତ୍ତପ୍ତ ସୌରମଣ୍ଡଳ ଆମୂଳଚୂଳ
ହନ୍ତସନ୍ତ ଅସ୍ତବ୍ୟସ୍ତ ଜନଜୀବନ ।
କାହିଁକି କେଜାଣି
ମନ ମସ୍ତିଷ୍କରେ ଭାଳେଣି
ବୋଧହୁଏ ରୁଷିଛି ପ୍ରକୃତି ରାଣୀ ଧରଣୀ
ଦେଖି ମଣିଷର ଅତ୍ୟାଚାର
ନୀରବରେ ପ୍ରତିଶୋଧ ନେଉଛି
ଅଙ୍କୁଶ ବିହୀନ ବ୍ୟଭିଚାର ।
କାହିଁକି କେଜାଣି
ଅନ୍ଧପୁଟୁଳି ଭ୍ରମରେ ଜ୍ଞାନୀ ବିଜ୍ଞାନୀ ମାନବ
ବିଶ୍ୱନିୟନ୍ତା ପରମେଶ୍ଵର ନିଶାରେ
ମାତାଲ୍ ଅବିବେକୀ ଦାନବ ।
ଭବିଷ୍ୟତ ସତର୍କ ସନ୍ଦେଶ
ପାଇଁ ଅନ୍ଧ ମୂକ ବଧିର ସାଜି
ଜାଣି ଅଜଣା ଝୁଣ୍ଟି ପଡୁଛି
ପ୍ରକୃତି ହତ୍ୟାକାରୀ ବାଜି ।
ଲହୁ ଲୁହାଣ ହେବ ହିଁ ହେବ
ଅସତ୍ୟ ସହରେ
ରକ୍ତ କ୍ଷରଣ କହଦହ ମରଣ
ଶେଷପର୍ବ ଗୁଳିଗୁଳିରେ ।